Arijit Singh બાદ આ દિગ્ગજ સિંગર પણ લેશે સંગીતમાંથી સંન્યાસ? સોશિયલ મીડિયા પર કરેલી પોસ્ટથી ચર્ચાએ પકડયું જોર
છેલ્લું અપડેટ : 15 Jun 2026
Pritam Chakraborty Retirement Plan: અરિજિત સિંહ પછી શું હવે પ્રીતમ ચક્રવર્તી પણ સંગીતમાંથી સંન્યાસ લેવાના છે? પ્રીતમની તાજેતરની ઇન્સ્ટાગ્રામ પોસ્ટ પરથી તો એવું જ લાગી રહ્યું છે. પ્રીતમના ફેન્સ પૂછી રહ્યા છે કે શું તેઓ બોલિવૂડ સંગીતમાંથી સંન્યાસ લઈ રહ્યા છે?
બોલિવૂડના પ્રખ્યાત સંગીતકાર પ્રીતમ ચક્રવર્તીએ તાજેતરમાં જ 14 જૂનના રોજ પોતાનો 55મો જન્મદિવસ ઉજવ્યો. આ પ્રસંગે તેમણે ઇન્સ્ટાગ્રામ પર એક પોસ્ટ શેર કરીને પોતાના ફેન્સનો આભાર માન્યો, પરંતુ સાથે જ સંગીતની દુનિયામાંથી એક લાંબો બ્રેક લેવાનો ઇશારો પણ કર્યો, જેનાથી ફેન્સ વચ્ચે હલચલ મચી ગઈ છે.
પ્રીતમ ચક્રવર્તીએ પોતાની કેટલીક બ્લેક એન્ડ વ્હાઇટ તસવીરો ઇન્સ્ટાગ્રામ પર શેર કરતા લખ્યું કે તેઓ હવે જિંદગીને એક નવી રીતે જીવવા માંગે છે. તેમણે લખ્યું, 'મુખ્યધારા (મેઇનસ્ટ્રીમ) બોલિવૂડ સંગીતની સફર ખૂબ જ શાનદાર રહી છે, પરંતુ હવે તેઓ કેટલાક વર્ષો પોતાની જાતને ભેટમાં આપવા માંગે છે. તેઓ એ વસ્તુઓને સમય આપવા માંગે છે, જેને તેમણે કામના ચક્કરમાં પાછળ છોડી દીધી હતી. તેઓ હવે અજાણ્યા અને નવા રસ્તાઓ પર નીકળવા માંગે છે.'
પ્રીતમના આ પોસ્ટ પછી ફેન્સને લાગી રહ્યું છે કે તેઓ બોલિવૂડ સંગીતમાંથી સંન્યાસ લઈ રહ્યા છે. થોડા મહિનાઓ પહેલા જ મશહૂર ગાયક અરિજિત સિંહે પણ બ્રેક લેવાની વાત કહી હતી, તેથી ફેન્સ થોડા નિરાશ છે. લોકોનું કહેવું છે કે તેઓ હવે પ્રીતમ અને અરિજિતની જોડીને ખૂબ મિસ કરશે, જોકે કેટલાક ફેન્સ તેમના ઇન્ડિપેન્ડન્ટ મ્યુઝિકમાં આવવાની આશા પણ રાખી રહ્યા છે.
ગયા વર્ષે પ્રીતમે જણાવ્યું હતું કે તેઓ પોતાના બાળકો સાથે સમય વિતાવવા માંગે છે, જેઓ અભ્યાસ માટે અમેરિકા જઈ રહ્યા છે. તાજેતરમાં જ તેમણે શારીરિક અને માનસિક આરામ માટે એક નાનો બ્રેક લીધો હતો, જેના પછી તેમનો આ નિર્ણય વધુ મજબૂત થઈ ગયો. પ્રીતમે કહ્યું, 'હું હવે ડેડલાઇન્સ અને સતત કામ કરવાના દબાણથી ખૂબ થાકી ગયો છું. આ વખતે હું ઓછામાં ઓછો 3 થી 4 વર્ષનો લાંબો બ્રેક લેવા માંગું છું.'
શું તેમના આગામી પ્રોજેક્ટ્સ અટકી જશે?
પ્રીતમ પોતાના જૂના વચનો પૂરા કર્યા પછી જ બ્રેક પર જશે. તેમણે સ્પષ્ટ કર્યું કે તેમની પાસે હજી પણ લગભગ 10 આલ્બમનું કામ બાકી છે. જે ફિલ્મો પર તેમણે કામ શરૂ નહોતું કર્યું, તેમાંથી તેમણે હટી જવાની વિનંતી કરી છે.
અનુરાગ બસુની આગામી ફિલ્મનું કામ લગભગ પૂરું થઈ ચૂક્યું છે, જેમાં કાર્તિક આર્યન અને શ્રીલીલા જોવા મળશે. આ સિવાય કબીર ખાન અને વિક્રમાદિત્ય મોટવાણેની ફિલ્મનું કામ તેઓ બ્રેકમાંથી પાછા આવ્યા પછી સંભાળી શકે છે, જે સૌરવ ગાંગુલીની બાયોપિક છે.