Board Exam 2026 / બોર્ડ પરીક્ષામાં નહીં બેસી શકે આ વિદ્યાર્થીઓ, CBSE એ જારી કર્યા નિયમો
છેલ્લું અપડેટ : 16 Sept 2025
સેન્ટ્રલ બોર્ડ ઓફ સેકન્ડરી એજ્યુકેશન (CBSE) એ ધોરણ 10 અને 12ની બોર્ડ પરીક્ષાઓ માટે નવા ફરજિયાત નિયમો જારી કર્યા છે. આ નિયમોનો હેતુ વિદ્યાર્થીઓને બે વર્ષના શૈક્ષણિક કાર્યક્રમમાં ગંભીરતાથી અભ્યાસ કરવા અને આંતરિક મૂલ્યાંકન (Internal Assessment) ની પ્રક્રિયાને મજબૂત બનાવવાનો છે. બોર્ડ અનુસાર, ધોરણ 9-10 અને 11-12ને બે વર્ષના શૈક્ષણિક કાર્યક્રમ તરીકે ગણવામાં આવશે. વિદ્યાર્થીઓએ સતત બે વર્ષ સુધી પસંદ કરેલા વિષયોનો અભ્યાસ કરવો પડશે. ઉપરાંત, દરેક વિદ્યાર્થીની ઓછામાં ઓછી 75 ટકા હાજરી ફરજિયાત રહેશે.
CBSE એ સ્પષ્ટતા કરી છે કે બે વર્ષ સુધી આંતરિક મૂલ્યાંકન પૂર્ણ કરવું પણ જરૂરી રહેશે. આ મૂલ્યાંકનમાં નાપાસ થનારા વિદ્યાર્થીઓનું પરિણામ જાહેર નહીં કરવામાં આવે. વિદ્યાર્થીઓ ધોરણ 10માં વધુમાં વધુ બે વધારાના વિષયો અને ધોરણ 12માં એક વિષય પસંદ કરી શકે છે, પરંતુ આ વિષયોનો પણ સતત બે વર્ષ અભ્યાસ કરવો પડશે. નિયમો અનુસાર, વિદ્યાર્થીઓ ફક્ત તે જ વિષયો પસંદ કરી શકે છે જેના માટે શાળામાં શિક્ષકો, પ્રયોગશાળાઓ અને અન્ય સુવિધાઓ ઉપલબ્ધ હોય.
કમ્પાર્ટમેન્ટ પરીક્ષાના નિયમો
CBSEના નિયમો અનુસાર, જો કોઈ વિદ્યાર્થી વધારાના વિષયમાં "કમ્પાર્ટમેન્ટ" અથવા "એસેંશિયલ રિપીટ" શ્રેણીમાં આવે છે, તો તેણે ફરીથી ખાનગી ઉમેદવાર તરીકે પરીક્ષા આપી શકશે. જોકે, જે વિદ્યાર્થીઓ આ નિયમોનું પાલન નહીં કરે તેમને બોર્ડ પરીક્ષામાં ખાનગી ઉમેદવાર તરીકે વધારાના વિષયો પસંદ કરવાની મંજૂરી નહીં આપવામાં આવે. બોર્ડના અધિકારીઓ કહે છે કે આ ફેરફાર વિદ્યાર્થીઓમાં શિસ્ત અને ઊંડાણપૂર્વકના અભ્યાસની સંસ્કૃતિને પ્રોત્સાહન આપશે. CBSEનું આ પગલું શાળાઓમાં વધુ સારા સંસાધન સંચાલન અને વિદ્યાર્થીઓ માટે સમાન તકો સુનિશ્ચિત કરવા તરફ મહત્ત્વપૂર્ણ માનવામાં આવે છે.
