તહેવારો પહેલાં કઠોળના ભાવમાં ભડકો, ચણા-મગ-વટાણા સહિતના ભાવ 11% સુધી વધ્યા
છેલ્લું અપડેટ : 01 Oct 2026
અમદાવાદ: તહેવારોની સિઝનમાં માંગ વધવા સાથે કઠોળના ભાવમાં સતત વધારો જોવા મળી રહ્યો છે. ચણા, મગ, તુવેર અને વટાણા જેવા મુખ્ય કઠોળના ભાવમાં છેલ્લા એક મહિનામાં 6થી 11 ટકા સુધીનો વધારો થયો છે. છેલ્લા એક સપ્તાહમાં પણ ભાવ 3થી 5 ટકા વધ્યા છે. ચોમાસાના પાકને લઈને ચિંતા અને અલ નીનોની અસરને કારણે પુરવઠા અંગેની આશંકા વધી છે.
તહેવારોની માંગ વચ્ચે કઠોળના ભાવમાં ઉછાળો
સરકારે રસોઈ તેલ અને ખાંડના ભાવ ઘટાડવા માટે પગલાં લીધા છે, પરંતુ બીજી તરફ કઠોળના ભાવમાં વધારો યથાવત્ છે. ઇન્ડિયન પલ્સિસ એન્ડ ગ્રેઇન એસોસિએશનના આંકડા મુજબ છેલ્લા એક મહિનામાં મુખ્ય કઠોળના જથ્થાબંધ ભાવમાં નોંધપાત્ર વધારો થયો છે.
ભારતમાં સૌથી વધુ વપરાતા ચણાના ભાવમાં દિલ્હીની બહાર છેલ્લા એક મહિનામાં 11 ટકાનો વધારો થયો છે, જ્યારે માત્ર એક સપ્તાહમાં જ 5.5 ટકાનો વધારો નોંધાયો છે. તુવેરના ભાવમાં માસિક ધોરણે 6.5 ટકા અને સાપ્તાહિક ધોરણે 2.4 ટકાનો વધારો થયો છે.
મગ અને વટાણાના ભાવમાં પણ વધારો
લીલા મગના ભાવમાં છેલ્લા એક મહિનામાં 10.6 ટકા અને એક સપ્તાહમાં 4.3 ટકાનો વધારો થયો છે. જ્યારે વટાણાના ભાવમાં માસિક ધોરણે 6 ટકા અને સાપ્તાહિક ધોરણે 3 ટકાનો વધારો નોંધાયો છે. વાર્ષિક ધોરણે પણ ચણાના ભાવ 23 ટકા, કાળા ચણાના 24 ટકા અને વટાણાના ભાવમાં 47 ટકાનો વધારો થયો છે.
અલ નીનોની અસરથી પાક અંગે ચિંતા
ઉદ્યોગ અધિકારીઓના જણાવ્યા અનુસાર છેલ્લા મહિનામાં અલ નીનોની અસર વધુ સ્પષ્ટ બની છે. કર્ણાટક અને મહારાષ્ટ્ર જેવા રાજ્યોમાં મોટા વિસ્તારોમાં દુષ્કાળ જાહેર કરવામાં આવ્યો છે. જમીનમાં ભેજની અછતને કારણે આગામી રવિ પાકના વાવેતરને લઈને પણ ચિંતા વધી છે.
ઓસ્ટ્રેલિયાથી ચણાની ઉપલબ્ધતા પણ ગયા વર્ષની સરખામણીએ ઓછી રહેવાની આશંકા છે. બીજી તરફ, આંતરરાષ્ટ્રીય બજારમાં પીળા વટાણાના ભાવ વધી રહ્યા છે. પીળા વટાણાનો ઉપયોગ ચણાના વિકલ્પ તરીકે થતો હોવાથી તેની કિંમતોમાં વધારો પણ સ્થાનિક બજાર પર અસર કરી શકે છે.
