Global Energy Crisis: અમેરિકા-ઈરાન વિવાદમાં તેલની કિંમતોમાં 7%નો ઉછાળો, મોંઘવારી વધવાના સંકેત

અમેરિકા અને ઈરાન વચ્ચે વધી રહેલા તણાવની સીધી અસર હવે વૈશ્વિક અર્થતંત્ર પર જોવા મળી રહી છે. હોર્મુઝની સામુદ્રધુની (Hormuz Strait) માં સર્જાયેલી યુદ્ધ જેવી સ્થિતિ અને શાંતિ વાટાઘાટો નિષ્ફળ રહેવાના સંકેતો વચ્ચે આંતરરાષ્ટ્રીય બજારમાં કાચા તેલ (Crude Oil) ની કિંમતોમાં આગ લાગી છે.

તેલના ભાવમાં રાતોરાત ઉછાળો

રવિવારે ટ્રેડિંગ શરૂ થતાની સાથે જ તેલના ભાવમાં મોટો ઉછાળો જોવા મળ્યો હતો:

• બ્રન્ટ ક્રૂડ (Brent Crude): કિંમતો આશરે 6.5% વધીને 96.25 ડોલર પ્રતિ બેરલ પર પહોંચી ગઈ છે.

• WTI ક્રૂડ: અમેરિકી કાચા તેલની કિંમતમાં પણ 6.4% નો વધારો થતા ભાવ 87.88 ડોલર પ્રતિ બેરલ થઈ ગયા છે.

શાંતિની આશા ઠગારી નીવડી

થોડા દિવસો પહેલા એવી અપેક્ષા હતી કે ઈસ્લામાબાદમાં યોજાનારી બીજા રાઉન્ડની વાટાઘાટોથી તણાવ ઘટશે. પરંતુ રાષ્ટ્રપતિ ડોનાલ્ડ ટ્રમ્પે ઈરાની બંદરોની નાકેબંધી ચાલુ રાખવાની જાહેરાત કરતા જ સ્થિતિ વણસી છે. અમેરિકાએ ઈરાની જહાજને કબજે કર્યા બાદ અને ઈરાને અમેરિકી નેવી પર ડ્રોન હુમલા કર્યાના અહેવાલોથી બજારમાં ગભરાટ ફેલાયો છે.

વૈશ્વિક ઉર્જા સંકટનું જોખમ

ઈરાન અને અમેરિકા-ઈઝરાયેલ વચ્ચેનો આ જંગ હવે આઠમાં અઠવાડિયામાં પ્રવેશ્યો છે. આ વિવાદે દાયકાના સૌથી મોટા ઉર્જા સંકટને જન્મ આપ્યો છે. એશિયા અને યુરોપના એવા દેશો જે ખાડી દેશો પર તેલ માટે નિર્ભર છે, તેમને સપ્લાયમાં અડચણ અને વધતી કિંમતોને કારણે સૌથી વધુ આર્થિક ફટકો પડી શકે છે.