VIDEO:ANDARNI VAAT/તિરુવલ્લુરમાં ઝેરી એમોનિયા ગેસ લીક થતાં સાત શ્રમિકોના કરુણ મોત!

તામિલનાડુના તિરુવલ્લુર જિલ્લામાં એક અત્યંત હૃદયદ્રાવક અને મોટી ઔદ્યોગિક હોનારત સામે આવી છે. અહીં આવેલી 'સેન્ટ પીટર્સ પોલ સીફૂડ્સ એક્સપોર્ટ્સ' ફેક્ટરીમાં અચાનક ગેસ પાઈપલાઈનમાં લીકેજ થવાને કારણે આસપાસના વિસ્તારમાં ઝેરી એમોનિયા ગેસ ઝડપથી ફેલાઈ ગયો હતો. આ ગેસ શ્વાસમાં જતાં જ ફેક્ટરીમાં કામ કરતા શ્રમિકોમાં ગૂંગળામણ શરૂ થઈ ગઈ હતી. કમનસીબે, ગેસની તીવ્રતા એટલી વધારે હતી કે ઝેરી અસરના કારણે સાત નિર્દોષ લોકોના ઘટનાસ્થળે જ અથવા ટૂંકી સારવાર દરમિયાન કરુણ મોત નીપજ્યા છે. આ અણધારી દુર્ઘટનાને પગલે ફેક્ટરી પરિસરમાં ભારે અફરાતફરી અને નાસભાગ મચી જવા પામી હતી.

આ ગેસ લીકેજની ઘટનામાં અન્ય અનેક કર્મચારીઓ પણ ઝેરી ગેસની અસરમાં આવી ગયા છે, જેમને બચાવ કામગીરી હાથ ધરીને તાત્કાલિક અસરથી નજીકની હોસ્પિટલોમાં ખસેડવામાં આવ્યા છે. હાલમાં આ તમામ ઇજાગ્રસ્તો હોસ્પિટલમાં જીવન-મરણ વચ્ચે ઝોલા ખાતા સારવાર હેઠળ છે, જેમાં કેટલાકની હાલત અત્યંત નાજુક હોવાનું જાણવા મળ્યું છે. સ્થાનિક વહીવટી તંત્ર, ફાયર બ્રિગેડ અને પોલીસનો મોટો કાફલો તાત્કાલિક ઘટનાસ્થળે દોડી ગયો હતો અને ગેસ લીકેજ પર કાબૂ મેળવવાની કવાયત હાથ ધરી સમગ્ર પ્લાન્ટને ખાલી કરાવ્યો હતો. તંત્ર દ્વારા આ ગંભીર બેદરકારી બદલ ફેક્ટરી સંચાલકો સામે તપાસના આદેશો આપવામાં આવ્યા છે.

બ્યૂરો રિપોર્ટ જીએસટીવી