VIDEO: "મને ધક્કો મારી નીચે પાડી દીધો...": CJP પ્રદર્શનમાં સબ ઈન્સ્પેક્ટર બજરંગ યાદવ ઈજાગ્રસ્ત

રાજધાની દિલ્હીમાં 'કોકરોચ જનતા પાર્ટી' (CJP)ના વિરોધ પ્રદર્શન દરમિયાન સ્થિતિ વણસતાં ફરજ પર હાજર દિલ્હી પોલીસના સબ ઈન્સ્પેક્ટર (SI) બજરંગ યાદવ ઈજાગ્રસ્ત થયા છે. ઘટના બાદ તેમણે સ્થળ પર જ પ્રાથમિક સારવાર લીધી હતી અને સમગ્ર બનાવ અંગે વિગતવાર માહિતી આપી હતી.

ઘટનાની વિગત આપતા સબ ઈન્સ્પેક્ટર બજરંગ યાદવે જણાવ્યું કે, "હું હજુ હોસ્પિટલ ગયો નથી, પરંતુ પ્રાથમિક સારવાર (First Aid) લઈ લીધી છે. જ્યારે અમને ખ્યાલ આવ્યો કે લોકો સીપીએમ (CPM) ઓફિસ તરફથી અમારી દિશામાં દોડી રહ્યા છે, ત્યારે અમે તેમને અહીં જીપીઓ (GPO) પાસે રોકવાનો પ્રયાસ કર્યો હતો, પરંતુ તેઓ માનવા તૈયાર નહોતા. તેઓ સતત જોરશોરથી કહી રહ્યા હતા કે તેઓ ગમે તે ભોગે જંતર મંતર અને ચૂંટણી પંચની ઓફિસે જશે જ."

પોતાને થયેલી ઈજા અંગે તેમણે ઉમેર્યું કે, "જ્યારે હું તેમને રોકવાનો પ્રયત્ન કરી રહ્યો હતો, ત્યારે મને જોરથી ધક્કો મારીને નીચે પાડી દેવામાં આવ્યો, જેના કારણે મને ઈજા થઈ છે. હું ત્યાં એકલો હતો અને એક વ્યક્તિને રોકવાની કોશિશ કરી રહ્યો હતો, પરંતુ તેણે મને નીચે પાડી દીધો. જોકે તેઓ કોઈ અપશબ્દો બોલી રહ્યા નહોતા, માત્ર ચૂંટણી પંચ અને જંતર મંતર જવા માટે મક્કમ હતા. આ ધક્કામુક્કીમાં મને હાથમાં અને પીઠના ભાગે ઈજાઓ પહોંચી છે."

દિલ્હીમાં જંતર મંતર અને અન્ય સંવેદનશીલ વિસ્તારો તરફ આગળ વધી રહેલા પ્રદર્શનકારીઓને રોકવા માટે પોલીસે ભારે બંદોબસ્ત ગોઠવ્યો છે, તે દરમિયાન સુરક્ષાકર્મીઓ અને પ્રદર્શનકારીઓ વચ્ચે ઘર્ષણના બનાવો સામે આવી રહ્યા છે.