VIDEO: કપરાડાના નિલોશીમાં ઓનલાઈન કામગીરીના તાણથી પ્રાથમિક શાળાના આચાર્યએ આત્મહત્યા કરી

વલસાડ જિલ્લાના કપરાડા તાલુકા સ્થિત નિલોશી ગામની પ્રાથમિક શાળામાંથી એક અત્યંત આઘાતજનક ઘટના સામે આવી છે. શાળાના આચાર્ય શંકરભાઈ જાધવે ગળે ફાંસો ખાઈને પોતાનું જીવન ટૂંકાવી લીધું છે. સવારના સમયે તેમણે આત્મહત્યા કરી લેતાં સમગ્ર શિક્ષક આલમ અને સ્થાનિક વિસ્તારમાં ભારે ચકચાર મચી ગઈ છે. પ્રાથમિક માહિતી મુજબ, શિક્ષણ વિભાગની ઓનલાઈન કામગીરીનું અતિશય ભારણ હોવાના કારણે તેઓ છેલ્લા કેટલાક સમયથી સતત માનસિક તાણ અનુભવી રહ્યા હતા. ઘટનાની જાણ થતાં જ કપરાડા પોલીસ સ્ટેશનનો કાફલો, અન્ય શિક્ષકો અને મૃતકના પરિવારજનો સ્થળ પર પહોંચ્યા હતા. પોલીસે ઘટનાસ્થળેથી મળેલી સ્યુસાઈડ નોટ કબજે કરીને સમગ્ર મામલે ઊંડાણપૂર્વક કાનૂની તપાસ શરૂ કરી છે.