"ઈરાન પર હુમલા ચાલુ રાખીશું" - ડોનાલ્ડ ટ્રમ્પ સાથે વાતચીત બાદ નેતન્યાહુનું મોટું નિવેદન

ઈરાન સાથેના યુદ્ધમાં સીઝફાયર (યુદ્ધવિરામ) અંગેની અટકળો વચ્ચે ઈઝરાયેલના વડાપ્રધાન બેન્જામિન નેતન્યાહુએ જણાવ્યું છે કે તેમણે અમેરિકી રાષ્ટ્રપતિ ડોનાલ્ડ ટ્રમ્પ સાથે વાતચીત કરી છે. નેતન્યાહુએ કહ્યું કે રાષ્ટ્રપતિ ટ્રમ્પનું માનવું છે કે ઈરાનમાં અમેરિકા-ઈઝરાયેલની સૈન્ય સફળતાને એવા કરારમાં ફેરવી શકાય છે જે ઈઝરાયેલના હિતોનું રક્ષણ કરે.

પીએમ નેતન્યાહુએ 'X' પર એક વીડિયો શેર કરતા કહ્યું, "મેં મારા મિત્ર રાષ્ટ્રપતિ ટ્રમ્પ સાથે વાત કરી છે. તેમનું માનવું છે કે અમેરિકી સેના સાથે મળીને અમે જે શાનદાર સિદ્ધિઓ હાંસલ કરી છે, તેનો લાભ ઉઠાવીને આપણા ઉદ્દેશ્યો પૂરા કરવાની આ એક તક છે. એક એવો કરાર જે આપણા મહત્વપૂર્ણ હિતોનું રક્ષણ કરશે."

ઈરાન અને લેબનાન પર હુમલા ચાલુ

આ સાથે જ નેતન્યાહુએ સ્પષ્ટ કર્યું કે, "અમે ઈરાન અને લેબનાન બંને પર હુમલા ચાલુ રાખ્યા છે. અમે મિસાઈલ કાર્યક્રમ અને પરમાણુ કાર્યક્રમને નેસ્તનાબૂદ કરી રહ્યા છીએ, અને હિઝબુલ્લાહ પર સતત હુમલા કરી રહ્યા છીએ. થોડા દિવસો પહેલા જ અમે વધુ બે પરમાણુ વૈજ્ઞાનિકોને ઠાર કર્યા છે અને અમારી કાર્યવાહી હજુ પણ ચાલુ છે. અમે કોઈપણ સંજોગોમાં અમારા મહત્વપૂર્ણ હિતોની રક્ષા કરીશું."

ઈરાની અધિકારી સાથે વાતચીતનો દાવો

નોંધનીય છે કે નેતન્યાહુનું આ નિવેદન એવા સમયે આવ્યું છે જ્યારે ટ્રમ્પે એક અજ્ઞાત ઈરાની અધિકારી સાથે 'ખૂબ સારી વાતચીત' થઈ હોવાનો દાવો કર્યો હતો. ટ્રમ્પે તેહરાનને 'હોર્મુઝ સ્ટ્રેટ શિપિંગ લેન' ફરીથી ખોલવા માટે કહ્યું છે, અન્યથા અમેરિકી સેના દ્વારા તેમના પાવર પ્લાન્ટ્સને ઉડાવી દેવાની ચેતવણી આપી છે.