'ટ્રમ્પને પાક. આર્મી ચીફ મુનીર પ્રત્યે ઉપજ્યો પ્રેમ', પહેલા આમંત્રણ આપવાનો ઇનકાર કર્યો, હવે સાથે લંચ કરશે

અમેરિકન રાષ્ટ્રપતિ ડોનાલ્ડ ટ્રમ્પ(American President Donald Trump) આજે એટલે કે બુધવાર, 18 જૂને લંચ સમયે પાકિસ્તાની આર્મી ચીફ જનરલ અસીમ મુનીરને(Pakistani Army Chief General Asim Munir) મળશે. બુધવાર માટે વ્હાઇટ હાઉસ દ્વારા જાહેર કરાયેલ રાષ્ટ્રપતિ ટ્રમ્પના શેડ્યૂલમાં લખ્યું છે કે તેઓ આજે કેબિનેટ રૂમમાં પાકિસ્તાની જનરલ અસીમ મુનીર સાથે લંચ કરશે. અસીમ મુનીર હાલમાં અમેરિકામાં છે. અહેવાલો અનુસાર, પાકિસ્તાની લશ્કરી નેતા તેમની યુએસ મુલાકાત દરમિયાન સેક્રેટરી ઓફ સ્ટેટ માર્કો રુબિયો(Secretary of State Marco Rubio) અને સંરક્ષણ પ્રધાન પીટ હેગસેથને(Defense Secretary Pete Hegseth) પણ મળે તેવી અપેક્ષા છે.

મુનીર પાંચ દિવસની મુલાકાતે અમેરિકા પહોંચ્યા

રવિવારે પાંચ દિવસની સત્તાવાર મુલાકાતે વોશિંગ્ટન પહોંચેલા મુનીર, અમેરિકા સાથે વ્યૂહાત્મક સંબંધોને મજબૂત બનાવવા માંગે છે. એક અહેવાલમાં જણાવાયું છે કે આ મુલાકાત "મુખ્યત્વે દ્વિપક્ષીય પ્રકૃતિની" છે. છતાં 14 જૂને યુએસ આર્મીની 250મી વર્ષગાંઠની ઉજવણી સાથે સત્તાવાર રીતે જોડાયેલી નથી.

અગાઉ, એવી અફવાઓ હતી કે પાકિસ્તાની ફિલ્ડ માર્શલ યુએસ આર્મી ડે પરેડમાં હાજરી આપશે. જો કે, અમેરિકાએ આ દાવાઓને સત્તાવાર રીતે નકારી કાઢ્યા હતા. વ્હાઇટ હાઉસના એક અધિકારીએ કહ્યું, "આ જૂઠાણું છે. કોઈ વિદેશી લશ્કરી નેતાને આમંત્રણ આપવામાં આવ્યું ન હતું."

અસીમ મુનીરને અમેરિકામાં વિરોધનો સામનો કરવો પડ્યો

અસીમ મુનીરને સોમવારે તેમની યુએસ મુલાકાત દરમિયાન વિદેશી પાકિસ્તાનીઓ અને પાકિસ્તાન તહરીક-એ-ઇન્સાફના કાર્યકરોના વિરોધનો સામનો કરવો પડ્યો. તેમની વિરુદ્ધ સૂત્રોચ્ચાર કરવામાં આવ્યા. સોમવારે, જ્યારે વોશિંગ્ટન ડીસીમાં આયોજિત એક કાર્યક્રમમાં પાકિસ્તાની આર્મી ચીફ અસીમ મુનીરનું સ્વાગત કરવામાં આવી રહ્યું હતું, ત્યારે ત્યાં હાજર લોકોએ "પાકિસ્તાનીઓના હત્યારા" અને "ઇસ્લામાબાદના હત્યારા" ના નારા લગાવ્યા. લોકોમાં તેમના વિરુદ્ધ ભારે ગુસ્સો હતો. અસીમ મુનીર વિરુદ્ધ વિરોધ પ્રદર્શનના વીડિયો સોશિયલ મીડિયા પર વાયરલ થઈ રહ્યા છે.