VIDEO: કોલંબિયામાં ભયાનક ભૂકંપ બાદ અનેક હળવા આંચકા, 240 લોકોના મોત
છેલ્લું અપડેટ : 12 Aug 2026
દક્ષિણ અમેરિકન દેશ કોલંબિયાના પશ્ચિમ ભાગમાં 10 ઓગસ્ટે 7.4ની તીવ્રતાનો એક શક્તિશાળી ભૂકંપ આવ્યો હતો, જેનાથી સમગ્ર વિસ્તાર ધ્રૂજી ઊઠ્યો હતો. આ ભૂકંપનું કેન્દ્ર બિંદુ ચોકો વિભાગના સેન જોસ ડેલ પાલમાર પાસે જમીનથી 100થી 110 કિલોમીટરની ઊંડાઈએ હતું. આ ભયાનક હોનારતમાં અત્યાર સુધીમાં 240થી વધુ લોકોના મોત નીપજ્યા છે અને સેંકડો લોકો કાટમાળ નીચે ફસાયેલા હોવાની આશંકા છે. કોલંબિયાના જીઓલોજિકલ સર્વે અનુસાર, આ ભૂકંપ 21મી સદીમાં દેશમાં આવેલો સૌથી શક્તિશાળી ભૂકંપ છે. અગાઉ વર્ષ 1999માં કોફી ક્ષેત્રમાં 6.2ની તીવ્રતાનો ભૂકંપ આવ્યો હતો જેમાં હજારથી વધુ લોકોના મોત થયા હતા અને આ વખતે પણ એ જ ક્ષેત્ર સૌથી વધુ પ્રભાવિત થતાં જૂની યાદો તાજી થઈ ગઈ છે. ભૂકંપ બાદ 30થી વધુ આફ્ટરશૉક્સ હળવા આંચકા નોંધાયા છે, જેમાં સૌથી મોટો આંચકો 5.0ની તીવ્રતાનો હતો. મુખ્ય આંચકાના એક દિવસ પછી પણ ઘણી નબળી પડેલી ઈમારતો ધડાકાભેર જમીનદોસ્ત થઈ રહી છે. બચાવ ટુકડીઓ અને સ્થાનિક સ્વયંસેવકો રાત-દિવસ કાટમાળ હટાવીને લોકોને બહાર કાઢવાનો પ્રયાસ કરી રહ્યા છે. જોકે, સતત આવી રહેલા આફ્ટરશૉક્સ, તૂટેલા રસ્તાઓ અને ટેલિકોમ નેટવર્ક ઠપ થઈ જવાના કારણે ચોકો જેવા દૂરના અને ગરીબ વિસ્તારો સુધી રાહત સામગ્રી તેમજ ભારે મશીનરી પહોંચાડવામાં ભારે મુશ્કેલીઓ પડી રહી છે.
