યુક્રેન સાથેના યુદ્ધ વચ્ચે રશિયાનું આક્રમક વલણ, પુતિને પરમાણુ દળને લશ્કરી કવાયત કરવા આપ્યા આદેશ

યુક્રેનને લઈને પશ્ચિમી દેશો સાથે વધી રહેલા તણાવ વચ્ચે રશિયાના રાષ્ટ્રપતિ વ્લાદિમીર પુતિને દેશના પરમાણુ દળોને મિસાઈલ પ્રક્ષેપણ સહિત વ્યાપક કવાયત શરૂ કરવાનો આદેશ આપ્યો છે. ટોચના સૈન્ય અધિકારીઓ સાથે વીડિયો કોન્ફરન્સ દરમિયાન, પુતિને કહ્યું કે કવાયતમાં પરમાણુ-સક્ષમ બેલિસ્ટિક અને ક્રુઝ મિસાઇલોના પ્રેક્ટિસ લોન્ચનો સમાવેશ થશે. પુતિનના આદેશ બાદ રશિયાના ન્યુક્લિયર ફોર્સે પરમાણુ મિસાઈલનું પરીક્ષણ શરૂ કરી દીધું છે.

પુતિને આ વાત પર ભાર મૂક્યો હતો

પુતિન, જેમણે યુક્રેન માટે પશ્ચિમના વધતા સમર્થનને પગલે પરમાણુ શક્તિનો વારંવાર ઉલ્લેખ કર્યો છે, તેમણે ભારપૂર્વક જણાવ્યું હતું કે રશિયાનું પરમાણુ શસ્ત્રાગાર "દેશની સાર્વભૌમત્વ અને સુરક્ષાની વિશ્વસનીય ગેરંટી" છે. "વધતા ભૌગોલિક રાજકીય તણાવ અને ઉભરતા નવા જોખમોને ધ્યાનમાં રાખીને, આપણા માટે આધુનિક વ્યૂહાત્મક દળો કે જે હંમેશા યુદ્ધ માટે તૈયાર હોય તે મહત્ત્વપૂર્ણ છે," પુતિને કહ્યું કે રશિયા તેના પરમાણુ શસ્ત્રોને  પોતાની સુરક્ષા સુનિશ્ચિત કરવાનો છેલ્લો ઉપાય મને છે. 

રશિયન સંરક્ષણ મંત્રાલયે શું કહ્યું

દરમિયાન, રશિયન સંરક્ષણ મંત્રાલયે જણાવ્યું હતું કે મંગળવારની કવાયતના ભાગ રૂપે, સેનાએ કામચટકા દ્વીપકલ્પ પર કુરા પરીક્ષણ શ્રેણીમાં પ્લેસેટ્સક લોન્ચ પેડથી યાર્સ ઇન્ટરકોન્ટિનેન્ટલ બેલિસ્ટિક મિસાઇલ (ICBM) નું પરીક્ષણ કર્યું હતું. નોવોમોસ્કોવસ્ક અને ક્ન્યાઝ ઓલેગ પરમાણુ સબમરીન મિસાઇલોનું પરીક્ષણ કરે છે, જ્યારે પરમાણુ-સક્ષમ Tu-95 વ્યૂહાત્મક બોમ્બરોએ લાંબા અંતરની ક્રુઝ મિસાઇલોની પ્રેક્ટિસ લોન્ચ કરી હતી. સંરક્ષણ મંત્રાલયે પુષ્ટિ કરી છે કે તમામ મિસાઇલોએ તેમના લક્ષ્યોને નષ્ટ કરી દીધા છે.

પુતિને ચેતવણી આપી હતી

ગયા મહિને રશિયાના રાષ્ટ્રપતિ વ્લાદિમીર પુતિને અમેરિકા અને નાટો સહયોગીઓને ચેતવણી આપી હતી. પુતિને સ્પષ્ટ કહ્યું હતું કે જો યુક્રેન રશિયાની અંદર હુમલા કરવા માટે પશ્ચિમી દેશો દ્વારા આપવામાં આવેલા લાંબા અંતરના શસ્ત્રોનો ઉપયોગ કરે છે, તો તે માનવામાં આવશે કે નાટોએ રશિયા સામે યુદ્ધ શરૂ કર્યું છે.