VIDEO: અમારા માટે ધાર્મિક રીતે પરમાણુ હથિયાર ગેરકાયદેસર; ઈરાની રાષ્ટ્રપતિ પેજેશ્કિયન
છેલ્લું અપડેટ : 26 Sept 2026
ન્યૂયોર્કમાં સંયુક્ત રાષ્ટ્ર મહાસભા દરમિયાન ઈરાનના રાષ્ટ્રપતિ મસૂદ પેજેશ્કિયને પરમાણુ કાર્યક્રમ અંગે મહત્વપૂર્ણ નિવેદન આપ્યું છે. ફોક્સ ન્યૂઝને આપેલા ઇન્ટરવ્યૂમાં તેમણે સ્પષ્ટપણે કહ્યું કે ઈરાનનો હેતુ અણુ બોમ્બ બનાવવાનો નથી. તેમણે કહ્યું કે તેમના દિવંગત સર્વોચ્ચ નેતા આયાતુલ્લાહ ખામેનીએ પણ પરમાણુ હથિયારોને ધાર્મિક રીતે ગેરકાયદેસર અને અશુભ ગણાવ્યા હતા. પેજેશ્કિયને પરમાણુ કાર્યક્રમની આંતરરાષ્ટ્રીય ચકાસણી અને સંવર્ધિત યુરેનિયમના જથ્થાને ઘટાડવાની તૈયારી પણ દર્શાવી હતી.
પરમાણુ કાર્યક્રમની તપાસ માટે ઈરાન તૈયાર
પેજેશ્કિયને જણાવ્યું કે ઈરાન સંવર્ધિત યુરેનિયમના જથ્થાને ઘટાડવા તેમજ આંતરરાષ્ટ્રીય નિરીક્ષકોને પરમાણુ કાર્યક્રમની ચકાસણી કરવાની મંજૂરી આપવા તૈયાર છે. જોકે, ઈરાનના પરમાણુ કાર્યક્રમને લઈને આંતરરાષ્ટ્રીય પરમાણુ ઊર્જા એજન્સી (IAEA) દ્વારા સતત ચિંતા વ્યક્ત કરવામાં આવી રહી છે. એજન્સીએ ઈરાનના પરમાણુ સ્થળો અને સામગ્રી અંગે જરૂરી માહિતી તથા સ્થળ પર ચકાસણીમાં મુશ્કેલીઓનો ઉલ્લેખ કર્યો છે.
અમેરિકાએ વાતચીતને બદલે સૈન્ય કાર્યવાહી કરી: પેજેશ્કિયન
ઈરાની રાષ્ટ્રપતિએ અમેરિકા પર પણ આકરા આરોપ લગાવ્યા હતા. તેમના જણાવ્યા મુજબ, વોશિંગ્ટને મંત્રણાનો માર્ગ ચાલુ રાખવાને બદલે બોમ્બમારો અને સૈન્ય કાર્યવાહીનો રસ્તો પસંદ કર્યો. પેજેશ્કિયને દાવો કર્યો કે ઈરાનની સૈન્ય કાર્યવાહી સ્વબચાવના ભાગરૂપે હતી. તેમણે ફરીથી સંકેત આપ્યો કે પરમાણુ મુદ્દે આંતરરાષ્ટ્રીય ચકાસણી અને વાટાઘાટો માટે તેહરાન તૈયાર છે.
નેતન્યાહુના ભાષણ સમયે અનેક પ્રતિનિધિઓનો વોકઆઉટ
આ દરમિયાન ઈઝરાયલના વડાપ્રધાન બેન્જામિન નેતન્યાહુએ સંયુક્ત રાષ્ટ્રની 81મી મહાસભામાં ભાષણ આપ્યું ત્યારે અનેક દેશોના પ્રતિનિધિઓ હોલમાંથી બહાર નીકળી ગયા હતા. નેતન્યાહુએ વોકઆઉટ કરનારા પ્રતિનિધિઓને કટાક્ષભર્યો જવાબ આપ્યો હતો. અહેવાલો અનુસાર, અનેક આરબ અને મુસ્લિમ દેશોના પ્રતિનિધિઓએ તેમના ભાષણની શરૂઆતમાં જ વોકઆઉટ કર્યું હતું.
નેતન્યાહુએ હાથમાં પેજર બતાવી હિઝબુલ્લાહને યાદ અપાવ્યું
નેતન્યાહુએ પોતાના ભાષણ દરમિયાન એક પેજર હાથમાં લઈને હિઝબુલ્લાહનો ઉલ્લેખ કર્યો હતો. તેમણે 2024માં લેબનોનમાં થયેલા પેજર અને વોકી-ટોકી વિસ્ફોટોની યાદ અપાવી હતી. આ ઘટનામાં હિઝબુલ્લાહના સભ્યો સહિત મોટી સંખ્યામાં લોકો માર્યા ગયા અથવા ઘાયલ થયા હતા. નેતન્યાહુએ પોતાના ભાષણમાં ઈઝરાયલ સામે થઈ રહેલી આંતરરાષ્ટ્રીય ટીકા અને યહૂદી વિરોધી વલણનો પણ ઉલ્લેખ કર્યો હતો.
સાત દિવસમાં હોર્મુઝ ખોલવાની ઈરાનની શરત
ઈરાને પરમાણુ મુદ્દે ફરી વાટાઘાટો શરૂ કરવા સાથે હોર્મુઝની ખાડી ખોલવા અંગે પણ શરતો મૂકી છે. ઈરાનના વિદેશમંત્રી અબ્બાસ અરાઘચીના જણાવ્યા અનુસાર, અમેરિકા નૌકાદળની નાકાબંધી હટાવે, ઈરાનના તેલ પરના પ્રતિબંધો દૂર કરે અને યુદ્ધવિરામ સંબંધિત શરતોનું પાલન થાય તો તેહરાન પરમાણુ મુદ્દે વાતચીત શરૂ કરવા તૈયાર છે. ઈરાન તરફથી હોર્મુઝને સાત દિવસમાં ફરી ખોલવાની તૈયારીનો પણ સંકેત આપવામાં આવ્યો છે.
