પુલવામા હુમલાનો માસ્ટરમાઇન્ડ આતંકી હમઝા બુરહાન પાકિસ્તાનમાં ઠાર, અજાણ્યા શખ્સે મારી ગોળી

પુલવામા હુમલાના માસ્ટરમાઇન્ડ આતંકવાદી હમઝા બુરહાનને પાકિસ્તાનમાં એક અજ્ઞાત વ્યક્તિએ ગોળી મારી દીધી છે. સૂત્રોના જણાવ્યા અનુસાર, આ હુમલામાં આતંકીનું મોત નીપજ્યું છે. આતંકી હમઝા બુરહાનને પાકિસ્તાન શાસિત કાશ્મીર (PoK)ના મુઝફ્ફરાબાદમાં ગોળી મારવામાં આવી છે. હમઝા બુરહાન વર્ષ 2019માં પુલવામામાં થયેલા આત્મઘાતી આતંકી હુમલાના મુખ્ય માસ્ટરમાઇન્ડ પૈકીનો એક હતો. પાકિસ્તાનમાં તે પોતાની ઓળખ એક શિક્ષક (ટીચર) તરીકે આપતો હતો.

આ પણ વાંચો :

દિલ્હી બ્લાસ્ટના માસ્ટરમાઇન્ડ ઉમરના પુલવામા સ્થિત ઘરને સુરક્ષા એજન્સીઓએ IEDથી ઉડાવી દીધું

પુલવામામાંથી સંદિગ્ધ ઈલેક્ટ્રિશિયન ઝડપાયો, દિલ્હી બ્લાસ્ટ કેસમાં વધુ એકની ધરપકડ

ઓફિસમાં ઘૂસીને મારી ગોળી

મળતી માહિતી મુજબ, અજ્ઞાત હુમલાખોરે હમઝા બુરહાનને મુઝફ્ફરાબાદમાં નિશાન બનાવ્યો હતો. આ ઘટના ત્યારે બની જ્યારે આ આતંકવાદી પાકિસ્તાન શાસિત કાશ્મીરમાં આવેલી પોતાની ઓફિસમાં બેઠો હતો. પુલવામા હુમલાના કાવતરાખોરોમાં સામેલ હમઝા બુરહાન ભલે પાકિસ્તાનમાં શિક્ષક હોવાનો ઢોંગ કરતો હતો, પરંતુ 2019 પછી પણ તે અનેક આતંકવાદી ઘટનાઓમાં સક્રિય રીતે સામેલ રહ્યો હતો. તે PoKના વિસ્તારોમાં કેટલાય આતંકી સંગઠનોને ટ્રેનિંગ આપી રહ્યો હતો અને બોર્ડર (સરહદ) પરથી ભારતમાં આતંકીઓની ઘૂસણખોરી કરાવવામાં મદદ કરતો હતો.

40થી વધુ જવાનો થયા હતા શહીદ

ઉલ્લેખનીય છે કે, 14 ફેબ્રુઆરી 2019ના રોજ પુલવામામાં ભીષણ આતંકી હુમલો થયો હતો, જેમાં આતંકવાદીઓએ ભારતીય સેનાના કાફલાને નિશાન બનાવ્યો હતો. આ કાયરતાપૂર્ણ હુમલામાં ભારતના 40થી વધુ વીર જવાનો શહીદ થયા હતા. પુલવામા હુમલાનો બદલો લેવા માટે ભારતે 'ઓપરેશન બાલાકોટ' અંજામ આપ્યું હતું, જેમાં ભારતીય વાયુસેનાએ પાકિસ્તાનની સરહદમાં ઘૂસીને આતંકવાદીઓના અડ્ડાઓનો ખાતમો બોલાવ્યો હતો.