અમેરિકામાં ફરી એક વિમાન દુર્ઘટના: ન્યૂયોર્ક જતી ફ્લાઇટમાં આગ લાગી, તમામ મુસાફરોનો બચ્યો જીવ
છેલ્લું અપડેટ : 03 Feb 2025
ફરી એકવાર અમેરિકાથી વિમાન દુર્ઘટનાના સમાચાર આવ્યા છે. રવિવારે હ્યુસ્ટનથી ન્યૂયોર્ક જતી યુનાઇટેડ એરલાઇન્સની ફ્લાઇટના એન્જિનમાં ટેકઓફના થોડા સમય પહેલા આગ લાગી જતાં તેને ખાલી કરાવવામાં આવી હતી. ફ્લાઇટ ૧૩૮૨ સ્થાનિક સમય મુજબ સવારે ૮:૩૦ વાગ્યે જ્યોર્જ બુશ ઇન્ટરકોન્ટિનેન્ટલ એરપોર્ટથી લાગાર્ડિયા એરપોર્ટ માટે રવાના થવાની હતી ત્યારે ક્રૂને એન્જિન નિષ્ફળતાનો સંકેત મળ્યો અને રનવે પર ટેકઓફ રદ કરવામાં આવ્યો. એરલાઈને અકસ્માત અંગે માહિતી આપતા એક નિવેદન જારી કર્યું છે.
તમામ ૧૦૪ મુસાફરો સ્લાઇડ્સ અને સીડીઓનો ઉપયોગ કરીને વિમાનમાં કાઢ્યા બહાર
અધિકારીઓએ જણાવ્યું હતું કે તમામ ૧૦૪ મુસાફરો સ્લાઇડ્સ અને સીડીઓનો ઉપયોગ કરીને વિમાનમાંથી રનવે પર સુરક્ષિત રીતે નીચે ઉતર્યા હતા અને બસ દ્વારા ટર્મિનલ પર લઈ જવામાં આવ્યા હતા અને કોઈ ઈજા થઈ નથી.
સોશિયલ મીડિયા પર દુર્ઘટનાના વિડિયો વાયરલ
સોશિયલ મીડિયા પર વાયરલ થયેલા અકસ્માતના વિડિયોમાં, ન્યૂયોર્કના લાગાર્ડિયા એરપોર્ટ જઈ રહેલા એરબસ A319 વિમાનના એક એન્જિનમાંથી ધુમાડો અને આગ નીકળતી જોવા મળે છે. યુનાઇટેડ એરલાઇન્સે જણાવ્યું હતું કે મુસાફરોને રવિવારે બપોરે બીજી ફ્લાઇટ માટે ફરીથી શેડ્યૂલ કરવામાં આવ્યા હતા.
અમેરિકામાં સતત વિમાન દુર્ઘટનાઓ
તમને જણાવી દઈએ કે તાજેતરમાં વોશિંગ્ટનની બહાર રીગન નેશનલ એરપોર્ટ નજીક અમેરિકન એરલાઇન્સનું વિમાન યુએસ આર્મી બ્લેક હોક હેલિકોપ્ટર સાથે અથડાયું હતું. અકસ્માતને કારણે બંને વિમાન પોટોમેક નદીમાં પડી ગયા. યુએસ અધિકારીઓએ પુષ્ટિ આપી છે કે બધા 67 લોકો મૃત્યુ પામ્યા હોવાનું માનવામાં આવે છે. શુક્રવારે રાત્રે, ફિલાડેલ્ફિયામાં એક મોલ નજીક બીજું વિમાન ક્રેશ થયું હતું, જેમાં સાત લોકો માર્યા ગયા હતા અને 19 લોકો ઘાયલ થયા હતા.
