VIDEO: બોલિવિયામાં સૈન્ય મથકે ભયાનક વિસ્ફોટ, 10નાં મોત, 60થી વધુ લોકો ઘાયલ
છેલ્લું અપડેટ : 05 Sept 2026
Bolivia Military Base Explosion: દક્ષિણ અમેરિકાના બોલિવિયા દેશમાં એક મોટી દુર્ઘટના સામે આવી છે. 4 સપ્ટેમ્બરના રોજ રાજધાની લા પાઝથી લગભગ 30 કિલોમીટર દૂર આવેલા વિયાચા વિસ્તારમાં એક લશ્કરી મથકમાં ભયાનક વિસ્ફોટ થયો હતો. આ અકસ્માતમાં ઓછામાં ઓછા 10 લોકોના મોત થયા છે, જ્યારે 60થી વધુ લોકો ઘાયલ થયા છે. વિસ્ફોટ એટલો જોરદાર હતો કે આસપાસના વિસ્તારમાં અફરાતફરી મચી ગઈ હતી.
વિસ્ફોટના કારણ અંગે તપાસ
સ્થાનિક અધિકારીઓ દ્વારા મળતી વિગતો મુજબ, આ અકસ્માત બપોરે આશરે 2:30 વાગ્યે થયો હતો. વિસ્ફોટની શરૂઆત સેન્ય મથકના એ ચોક્કસ ભાગમાંથી થઈ હતી જ્યાં બોલિવિયાના સંરક્ષણ મંત્રાલય દ્વારા સત્તાવાર સરકારી કાર્યક્રમો અને ઉત્સવોમાં વાપરવા માટે રાખવામાં આવેલો ફટાકડા અને આતશબાજીની સામગ્રીનો જથ્થો સંગ્રહિત કરવામાં આવ્યો હતો.
આ કોઈ યુદ્ધના હથિયારો કે દારૂગોળો નહોતા, પરંતુ સત્તાવાર રીતે વપરાતા આતશબાજીના ફટાકડા જ હતા. જોકે, આ ફટાકડાના સ્ટોરેજમાં કયા ચોક્કસ કારણસર (જેમ કે શોર્ટ સર્કિટ, ગરમી કે અન્ય કોઈ ખામી) વિસ્ફોટ થયો, તેની સાચી માહિતી હજુ સુધી સામે આવી નથી. આ અંગે હાલ ગંભીરતાથી તપાસ ચાલી રહી છે.
