VIDEO: 300 કરોડની કિંમતની હવેલી બળીને ખાખ! લોસ એન્જલસમાં આગનું તાંડવ
છેલ્લું અપડેટ : 11 Jan 2025
અમેરિકાના કેલિફોર્નિયા રાજ્યના લોસ એન્જલસમાં જંગલમાં લાગેલી આગ ભારે તબાહી મચાવી રહી છે. વાસ્તવમાં એવું બન્યું કે એક સાથે અનેક વિસ્તારોમાં જંગલમાં આગ ફાટી નીકળી. જેના કારણે અનેક રહેણાંક વિસ્તારો પણ તેની અસરમાં આવી ગયા છે અને કરોડોની સંપત્તિ બળીને રાખ થઈ ગઈ છે. આ આગ હોલીવુડની હિલ્સને પણ લપેટમાં લઈ ગઈ, જ્યાં વિશ્વના ઘણા પ્રખ્યાત સ્ટાર્સનાં ઘર હતા. આ બધાની વચ્ચે એક વિડિયો સામે આવ્યો છે. જેમાં એક આલીશાન હવેલી આગની જ્વાળાઓમાં ઘેરાયેલી જોવા મળે છે. જેની કિંમત 300 કરોડ રૂપિયા હોવાનું કહેવાય છે.
મીડિયા રિપોર્ટ અનુસાર, આ હવેલી અમેરિકાની મોટી ઓનલાઈન રિયલ એસ્ટેટ વેબસાઈટ પર લિસ્ટેડ હતી. જ્યારે લોકોએ આ વિડિયો જોયો ત્યારે બધા ચોંકી ગયા કારણ કે આગની જ્વાળાઓએ આખી હવેલીને લપેટમાં લીધી હતી અને થોડી જ વારમાં હવેલી રાખ થઈ ગઈ હતી. આ દૃશ્ય જોયા બાદ લોકોનું કહેવું છે કે એવું લાગે છે કે આ વિસ્તારમાં કોઈએ પરમાણુ હુમલો કર્યો છે.
વાયરલ થઈ રહેલા વિડિયોમાં તમે જોઈ શકો છો કે આગ હવેલીને સંપૂર્ણ રીતે લપેટમાં લઈ ગઈ છે. જ્વાળાઓ હવેલીની ઊંચી દીવાલો ઓળંગતી જોવા મળે છે. આ દૃશ્યે લોસ એન્જલસના જંગલની આગની ભયાનકતાને ઉજાગર કરી છે. મીડિયા રિપોર્ટ અનુસાર મંગળવારથી પ્રસરી રહેલી આગએ શહેરના ઘણા ભાગોને લપેટમાં લીધા છે.
