Lebanon Blasts: કતર એરવેઝે ફ્લાઈટમાં પેજર અને વોકી-ટોકી લઇ જવા પર મુક્યો પ્રતિબંધ

16 સપ્ટેમ્બરે, લેબનોનમાં 3000 થી વધુ પેજર, વોકી-ટોકી અને હેન્ડહેલ્ડ રેડિયો અચાનક વિસ્ફોટ થવા લાગ્યા. આ ઘટનામાં હિઝબુલ્લાહના ઘણા લડવૈયા માર્યા ગયા હતા અને ઘણા ઘાયલ થયા હતા. બેરૂતમાં ઈરાનના રાજદૂત પણ ઘાયલ થયા છે.

આ ઘટના બાદ કતાર એરવેઝે લેબનોન જતી ફ્લાઈટમાં પેજર અને વોકી-ટોકી લઈ જવા પર પેસેન્જરો પર પ્રતિબંધ મૂક્યો છે. લેબનોનના ત્રણ વિસ્તારોમાં વોકી-ટોકી, હેન્ડહેલ્ડ રેડિયો અને પેજર સેટમાં થયેલા વિસ્ફોટ બાદ એરલાઈને આ પગલું ભર્યું છે. આ ઘટનામાં ઓછામાં ઓછા 32 લોકોના મોત થયા હતા અને 3000થી વધુ લોકો ઘાયલ થયા હતા. જેમાંથી 450 જેટલા લોકો ગંભીર રીતે ઘાયલ હોવાનું કહેવાય છે. લેબનીઝ અધિકારીઓએ સંદેશાવ્યવહાર માટે ઉપયોગમાં લેવાતા આ ઈલેક્ટ્રોનિક ગેજેટ્સમાં વિસ્ફોટો પાછળ ઈઝરાયેલી ષડયંત્રનો આરોપ લગાવ્યો છે.

કતાર એરવેઝે એક પોસ્ટમાં જણાવ્યું કે ફ્લાઇટમાં પેજર અને વૉકીટૉકી બ્લોક કરી દેવામાં આવી છે. આ પ્રતિબંધ આગામી સૂચના સુધી અમલમાં રહેશે.

લેબનોને કહ્યું છે કે ઇઝરાયલે અન્ય દેશોમાંથી આયાત કરાયેલા આ સાધનો સાથે છેડછાડ કરી છે. અહેવાલ મુજબ, દરેક પેજરમાં બેટરીની બાજુમાં લગભગ 1 થી 2 ઔંસ વિસ્ફોટક ફીટ કરવામાં આવ્યા હતા. રિપોર્ટમાં દાવો કરવામાં આવ્યો છે કે આ ઈલેક્ટ્રોનિક ઉપકરણોમાં એક સ્વીચ પણ લગાવવામાં આવી હતી, જેને દૂરથી નિયંત્રિત કરવામાં આવી રહી હતી. જ્યારે આ સ્વીચ સક્રિય કરવામાં આવ્યું ત્યારે પેજર વિસ્ફોટ થયો.

તાઈવાનની કંપની ગોલ્ડ એપોલોએ આ ઘટનાથી પોતાને દૂર રાખ્યા હતા

તાઈવાનની કંપની ગોલ્ડ એપોલો પર તેમના ઉત્પાદન દરમિયાન પેજર સાથે ચેડા કરવાનો આરોપ હતો. જોકે, ગોલ્ડ એપોલોએ આ આરોપોને નકારી કાઢતાં કહ્યું હતું કે વિસ્ફોટ કરનારા ઉપકરણો હંગેરીની રાજધાની બુડાપેસ્ટ સ્થિત ફર્મ દ્વારા બનાવવામાં આવ્યા હતા. હિઝબુલ્લાના ચીફ હસન નસરાલ્લાહે પેજર, વોકી-ટોકી અને હેન્ડહેલ્ડ રેડિયો બ્લાસ્ટને નરસંહાર ગણાવ્યા અને તેને યુદ્ધની શરૂઆત ગણાવી.

હિઝબુલ્લાના ચીફ હસન નસરાલ્લાહની યુદ્ધની ઘોષણા

હસને કહ્યું કે છેલ્લા બે દિવસમાં થયેલા આ હુમલાઓનો બદલો લેવામાં આવશે. હિઝબુલ્લાના વડાએ જણાવ્યું હતું કે લેબનોનમાં પેજર અને વોકી-ટોકી વિસ્ફોટો ગાઝામાં તેની તરફથી ચાલુ સહાયને અસર કરશે નહીં. દરમિયાન, ઇઝરાયેલના સંરક્ષણ પ્રધાન યોવ ગાલાન્ટે પણ યુદ્ધના 'નવા તબક્કા'ની શરૂઆતની જાહેરાત કરી હતી. આ વિસ્ફોટો પછી, લેબનોનમાં લોકો મોબાઈલ ફોન, પેજર અને અન્ય સંચાર ઉપકરણોને સ્પર્શતા ડરતા હોય છે. હિઝબુલ્લાહે તેના લડવૈયાઓને તેમના ફોન, પેજર, વોકી-ટોકી અને હેન્ડહેલ્ડ રેડિયોની બેટરીઓ કાઢીને ફેંકી દેવાની સૂચના આપી છે.