ઇઝરાયલે અમેરિકા-ઈરાનના શાંતિ કરારનો દેખાડ્યો ઠેંગો, ઇઝરાયલી સેનાના ભયાનક હુમલા,16 લોકોના મોત

ગઈકાલે ફ્રાન્સમાં અમેરિકા અને ઈરાન વચ્ચે શાંતિ કરાર પર હસ્તાક્ષર થયા હતા. બંને રાષ્ટ્રો 19 જૂનથી આ કરારની શરતો અંગે વાટાઘાટો શરૂ કરવા સંમત થયા હતા, આ પ્રક્રિયા માટે અમેરિકાના ઉપરાષ્ટ્રપતિ જેડી વાન્સ સ્વિટ્ઝર્લૅન્ડ જવાના હતા. જોકે, હવે આ પ્રવાસ રદ કરવામાં આવ્યો છે.   એક અહેવાલ મુજબ, બેઠક રદ કરવાનો નિર્ણય એટલો અચાનક લેવામાં આવ્યો હતો કે વાન્સનો સ્ટાફ અને તેમની સાથેના પત્રકારોનું નાનું જૂથ વોશિંગ્ટનની બહાર જોઈન્ટ બેઝ એન્ડ્રુઝ પર પહેલેથી જ પહોંચી ગયું હતું. આ દરમિયાન, વ્હાઇટ હાઉસના ડઝનબંધ અધિકારીઓ અને ઘણા વિદેશી મીડિયા કર્મચારીઓ સ્વિટ્ઝર્લૅન્ડમાં પહેલેથી જ હાજર હતા.યુએસ મીડિયા આઉટલેટ એક્સિઓસના અહેવાલ મુજબ, લેબનોન અંગે ઈરાનની માંગણીઓ વાન્સની સ્વિટ્ઝર્લૅન્ડ યાત્રા મુલતવી રાખવા પાછળનું કારણ હોઈ શકે છે. શાંતિ કરારમાં લેબનોનમાં ચાલી રહેલા સંઘર્ષ સહિત તમામ મોરચે દુશ્મનાવટનો અંત લાવવાની હાકલ કરવામાં આવી હતી. જો કે, લેબનોન પર ઇઝરાયલના સતત હુમલાઓ તિરાડો ઉભી કરી રહ્યા છે જે આગળની વાટાઘાટોને જટિલ બનાવે છે.   ઇઝરાયલી સૈન્યએ શુક્રવારે દક્ષિણ લેબનોનમાં અનેક ઠેકાણા પર હુમલા કર્યા હોવાનું જણાવ્યું હતું. દરમિયાન, લેબનોનની રાજ્ય સમાચાર એજન્સીએ અહેવાલ આપ્યો હતો કે આ હુમલાઓમાં ઓછામાં ઓછા 16 લોકો માર્યા ગયા છે. અલગથી, ઇઝરાયલી વડા પ્રધાન બેન્જામિન નેતન્યાહૂએ સૈન્ય પાછું ખેંચવાનો ઇનકાર કર્યો છે. તેમણે જણાવ્યું હતું કે હિઝબુલ્લાહનો ખતરો સંપૂર્ણપણે નાબૂદ ન થાય ત્યાં સુધી ઇઝરાયલી સૈનિકો લેબનોનમાં રહેશે.