IRGC પ્રવક્તા અલી મોહમ્મદનું ઇઝરાયલી હુમલામાં મોત, ઈરાનને વધુ એક મોટો ફટકો

ઇઝરાયલ અને અમેરિકા સાથે ઈરાનના યુદ્ધમાં IRGC પ્રવક્તા અલી મોહમ્મદના મૃત્યુ અંગેના અહેવાલો સામે આવી રહ્યા છે. મળતી માહિતી મુજબ અલી મોહમ્મદ ઇઝરાયલી હુમલામાં માર્યા ગયાની ઈરાને પણ સત્તાવાર રીતે પુષ્ટિ કરી છે.મધ્ય પૂર્વમાં ચાલી રહેલા સંઘર્ષનો 21મો દિવસ છે. દરેક પસાર થતા દિવસ સાથે લડાઈ વધુને વધુ ઉગ્ર બની રહી છે. ઇઝરાયલે હૈફા શહેર પર ઈરાનના હુમલાનો જોરદાર બદલો લીધો છે.

તેહરાન પર હુમલા ચાલુ

ઈઝરાયલે તેહરાન પર સતત હુમલાઓની ચાલુ રાખતાં આખું શહેર હચમચી ગયું છે. તેહરાનથી ઇઝરાયલી હુમલાનો બીજો એક વીડિયો સામે આવ્યો છે, જેમાં એક મોટા વિસ્ફોટની ક્ષણ કેદ કરવામાં આવી છે. એવો આરોપ છે કે ઇઝરાયલી મિસાઇલો સતત તેહરાનને નિશાન બનાવી રહી છે, જ્યાં વિસ્ફોટોના અવાજો સંભળાય છે. આ પહેલા ગુરુવારે રાત્રે ઈરાને ચાર ખાડી દેશો પર શક્તિશાળી હુમલા કર્યા હતા. ઈરાને દુબઈ, બહેરીન, કુવૈત અને યુએઈ પર હુમલા કર્યા હતા. દુબઈ સરકારે આ હુમલાઓની પુષ્ટિ કરી છે. દરમિયાન બહેરીનમાં ઈરાની હુમલા બાદ એક વેરહાઉસ રાખ થઈ ગયું હતું. ગલ્ફ દેશોમાં તૈનાત યુએસ હવાઈ સંરક્ષણ પ્રણાલીઓ આ હુમલાઓને અટકાવવા અને નિષ્ક્રિય કરવામાં સક્રિય રીતે રોકાયેલી છે.

ઈરાની નૌકાદળ દળો પર પણ હુમલો

એક મહત્વપૂર્ણ ઘટનાક્રમમાં ઇઝરાયલે પહેલીવાર કેસ્પિયન સમુદ્ર ક્ષેત્રમાં સ્થિત ઈરાની નૌકાદળના ઠેકાણાઓ પર હુમલો કર્યો છે. આ હુમલા દરમિયાન મિસાઈલ જહાજો અને કમાન્ડ સેન્ટરોનો નાશ કરવામાં આવ્યો હતો. ઈરાનનો આ ચોક્કસ પ્રદેશ રશિયન સરહદની નજીક આવેલો છે. પરિણામે આ માર્ગ દ્વારા મોસ્કો લઈ જવામાં આવતા માલના પુરવઠામાં હવે વિક્ષેપ પડી શકે છે. ઈરાને ઇઝરાયલી મિસાઇલોને અટકાવવાના પ્રયાસમાં તેની હવાઈ સંરક્ષણ પ્રણાલીઓને સક્રિય કરી છે. પરચીન મિલિટ્રી કોમ્પ્લેક્સ નજીક હવાઈ બોમ્બમારાનો અહેવાલ પણ સામે આવ્યો છે. આ ઉપરાંત કરમનમાં IRGC ઠેકાણાઓ પર પણ હુમલાના અહેવાલો સામે આવી રહ્યા છે.