ભારતના નિર્ણયથી તુર્કીની કંપનીને 4300 કરોડનો ફટકો, તુર્કીને પાકિસ્તાન સાથે દોસ્તી કરવી ભારે પડી

ઓપરેશન સિંદૂર વખતે પાકિસ્તાનની તરફેણ કરવી તુર્કીની સેલેબી એવિએશન કંપનીએ ભારે પડી છે. આ કંપનીને એક વર્ષ પહેલા ભારતમાંથી હાંકી કાઢવામાં આવી હતી, ત્યારે આ કારણે કેટલા કરોડનું નુકસાન થયું છે, તેની જાહેરાત કરી છે. 

ભારતના નિર્ણયથી  તુર્કીની કંપનીને 4300 કરોડનો ફટકો

કંપનીનો દાવો છે કે ભારત સરકારની કાર્યવાહીના કારણે તેને એક જ દિવસમાં અબજો રૂપિયાનો ઝટકો પડ્યો હતો અને તેની 500 મિલિયન ડોલર (4,300 કરોડ રૂપિયા)ની વેલ્યુ ખતમ થઈ ગઈ છે. બ્લૂમબર્ગને આપેલા ઈન્ટરવ્યુમાં કંપનીની ચેરપર્સન કેનન સેલેબિઓગ્લુએ જણાવ્યું કે, ભારતમાં વર્ષ 2000 થી ખૂબ મહેનત સાથે ઊભો કરેલો બે દાયકાનો બિઝનેસ એક જ દિવસમાં ખતમ થઈ ગયો.

ઓપરેશન સિંદૂર વખતે આતંકીસ્તાન પાકિસ્તાનને  તુર્કીએ આપ્યો સાથ

પહલગામ આતંકી હુમલાના જવાબમાં ભારતે 6 મેના રોજ પાકિસ્તાન અને પીઓકેમાં આતંકી ઠેકાણાઓ પર જડબાતોડ હુમલા કર્યા હતા, જેને 'ઓપરેશન સિંદૂર' નામ અપાયું હતું. આ 4 દિવસીય સૈન્ય સંઘર્ષ દરમિયાન તુર્કેઈએ ખુલ્લેઆમ પાકિસ્તાનનું સમર્થન કર્યું હતું અને તેને 350થી વધુ ડ્રોન, સૈન્ય સહયોગ, વાયુસેનાનું C-130 વિમાન તથા યુદ્ધ જહાજો મોકલ્યા હતા. તપાસમાં એ પણ સામે આવ્યું કે, આ ઓપરેશન દરમિયાન તુર્કેઈના બે સૈન્ય ઓપરેટિવ્સ પણ માર્યા ગયા હતા.

મે-2025માં તુર્કીની કંપની સામે કડક કાર્યવાહી

રાષ્ટ્રીય સુરક્ષાની ચિંતાઓને ધ્યાનમાં રાખીને કેન્દ્ર સરકારે મે 2025માં સેલેબીની ભારતીય બ્રાન્ચનું સિક્યોરિટી ક્લીયરન્સ તાત્કાલિક અસરથી રદ કરી દીધું હતું. સિક્યોરિટી ક્લીયરન્સ રદ થતાં જ સરકારે કંપનીના તમામ ઓપરેશન્સ રોકી દીધા, સાધનો જપ્ત કર્યા અને તેના આશરે 10 હજાર કર્મચારીઓને બીજા ઓપરેટર્સ પાસે ટ્રાન્સફર કરી દીધા, જેનાથી કંપની વિખરાઈ ગઈ હતી.