હોર્મુઝ સ્ટ્રેટમાં ભારત આવતું જહાજ ઈરાની કમાન્ડોએ કેવી રીતે કબજે કર્યું? જુઓ VIDEO
છેલ્લું અપડેટ : 23 Apr 2026
નવી દિલ્હી/દુબઈ: ઈરાન અને અમેરિકા વચ્ચેના વધતા તણાવ વચ્ચે ઈરાની નેવીએ સ્ટ્રેટ ઓફ હોર્મુઝમાં (Strait of Hormuz) મોટું ઓપરેશન પાર પાડીને બે વેપારી જહાજોને કબજે કર્યા છે. આ જહાજોમાંનું એક, 'Epaminondas', દુબઈથી નીકળીને ગુજરાતના મુંદ્રા પોર્ટ તરફ આવી રહ્યું હતું. ઈરાન દ્વારા જારી કરવામાં આવેલા નાટકીય વીડિયોમાં માસ્કધારી કમાન્ડો હેલિકોપ્ટર અને સ્પીડબોટ દ્વારા જહાજ પર કબજો કરતા જોઈ શકાય છે.
શું બની સમગ્ર ઘટના?
બુધવારે, જ્યારે અમેરિકાએ એકપક્ષીય રીતે યુદ્ધવિરામ લંબાવવાની જાહેરાત કરી હતી, તેના થોડા જ કલાકોમાં ઈરાની ક્રાંતિકારી ગાર્ડ્સ (IRGC) એ આ હુમલો કર્યો હતો.
-
લક્ષિત જહાજો: ઈરાને લિબેરિયાના ધ્વજવાળા 'Epaminondas' અને પનામાના ધ્વજવાળા 'MSC Francesca' નામના બે જહાજોને નિશાન બનાવ્યા હતા.
હુમલાની રીત: ઈરાની કમાન્ડો સ્પીડબોટ દ્વારા જહાજની નજીક પહોંચ્યા હતા અને ગ્રેનેડ તેમજ રોકેટ પ્રોપેલ્ડ ગ્રેનેડ (RPG) થી હુમલો કર્યો હતો. આ હુમલામાં જહાજના 'બ્રિજ' (કંટ્રોલ રૂમ) ને ભારે નુકસાન થયું છે, જોકે સદનસીબે ક્રૂના સભ્યો સુરક્ષિત હોવાના અહેવાલ છે.
ઈરાનનો તર્ક અને દાવા
ઈરાની મીડિયા અને સેનાએ દાવો કર્યો છે કે આ જહાજોએ દરિયાઈ નિયમોનું ઉલ્લંઘન કર્યું હતું અને તેમની નેવિગેશન સિસ્ટમ સાથે ચેડાં કર્યા હતા. ઈરાનનું કહેવું છે કે હોર્મુઝની ખાડીમાં સુરક્ષામાં ખલેલ પહોંચાડવી એ તેમના માટે 'રેડ લાઇન' છે. જાણકારોનું માનવું છે કે આ હુમલો અમેરિકા દ્વારા તાજેતરમાં ઈરાની જહાજોને પકડવાની કાર્યવાહીનો વળતો જવાબ હોઈ શકે છે.
ભારત માટે ચિંતાનો વિષય
ગુજરાતના મુંદ્રા પોર્ટ તરફ આવી રહેલા આ જહાજ પરના હુમલાથી ભારતની દરિયાઈ સુરક્ષા અને વ્યાપારિક રૂટ પર જોખમ ઊભું થયું છે. અગાઉ પણ ભારતીય જહાજો 'Jag Arnav' અને 'Sanmar Herald' પર હુમલાની ઘટનાઓ બની હતી, જેના પગલે ભારતે ઈરાન સમક્ષ સત્તાવાર રીતે ચિંતા વ્યક્ત કરી હતી.