થાઇલેન્ડ-કંબોડિયા યુદ્ધ વચ્ચે ચીને વધાર્યું ટેન્શન, તાઇવાન પાસે મોકલ્યા જેટ

તાઇવાનના સંરક્ષણ મંત્રાલયે જણાવ્યું કે ચીનના 17 સૈન્ય વિમાનો અને 7 નૌસૈનિક જહાજોની ગતિવિધિ તાઇવાન આસપાસ જોવામાં આવી છે. મંત્રાલય અનુસાર 17માંથી 8 ચીની સૈન્ય વિમાનોએ તાઇવાનની મધ્યરેખા પાર કરી હતી અને તાઇવાનના દક્ષિણ-પશ્ચિમ વાયુ સંરક્ષણ ક્ષેત્રમાં પ્રવેશ કર્યો હતો. 
 
ચીનની આ સૈન્ય ગતિવિધિના જવાબમાં તાઇવાન તરફથી સશસ્ત્ર સેનાઓએ સ્થિતિ પર નજર રાખી હતી અને પોતાના વિમાન, સબમરીન અને કોસ્ટગાર્ડને સક્રિય કરી જવાબી કાર્યવાહી કરી હતી. આ ઘટના એવા સમયે બની જ્યારે થાઇલેન્ડ અને કંબોડિયા વચ્ચે યુદ્ધ ચાલી રહ્યું છે.

પહેલા પણ ચીન કરી ચુક્યુ છે ઘૂસણખોરી

આ પહેલા તાઇવાનના સંરક્ષણ મંત્રાલયે જણાવ્યું હતું કે 26 ચીની લશ્કરી વિમાનો, 7 નૌકાદળના જહાજો અને એક સત્તાવાર જહાજ તાઇવાનની સરહદ નજીક જોવા મળ્યા હતા.26માંથી 24 વિમાનો મધ્ય રેખા પાર કરીને તાઇવાનના ઉત્તરીય અને દક્ષિણ પશ્ચિમ હવાઈ સંરક્ષણ ઓળખ ક્ષેત્રમાં પ્રવેશ્યા હતા. તાઇવાને તે સમયે પણ
જવાબી કાર્યવાહી કરી હતી.

મહત્ત્વપૂર્ણ છે કે તાઇવાન 1949થી સ્વતંત્ર રીતે શાસન કરે છે પરંતુ ચીન તેને તેના 'વન ચાઇના સિદ્ધાંત' હેઠળ પોતાનો ભાગ માને છે અને બેઇજિંગ સાથે પુન: એકીકરણની માંગ કરે છે. સતત ચીનના લશ્કરી દબાણ વચ્ચે, તાઇવાનની સેના ઉચ્ચ ચેતવણી પર છે અને ટાપુની સાર્વભૌમત્ત્વનું રક્ષણ કરવા અને પ્રાદેશિક સ્થિરતા જાળવવા માટે સતત દેખરેખ અને બદલો લઈ રહી છે.