VIDEO: ગિનીમાં કચરાનો પહાડ ધસી પડ્યો, અનેક ઝૂંપડીઓ દટાઈ; 30 લોકોના મોત, રેસ્ક્યૂ ઓપરેશન ચાલુ

આફ્રિકન દેશ ગિની (Guinea)ની રાજધાની કોનાક્રી (Conakry)માં રવિવારે વહેલી સવારે એક ભયાનક દુર્ઘટના સર્જાઈ હતી. શહેરની સૌથી મોટી કચરા ડમ્પિંગ સાઇટ (Landfill)માં કચરાનો વિશાળ ઢગલો અચાનક ધસી પડતાં આસપાસ આવેલી અનેક ઝૂંપડીઓ (Slums) કાટમાળ નીચે દટાઈ ગઈ હતી. આ દુર્ઘટનામાં અત્યાર સુધીમાં 30 લોકોના મોત થયા હોવાનું સરકાર તરફથી જણાવવામાં આવ્યું છે.

ભારે વરસાદ બાદ સર્જાઈ દુર્ઘટના

અધિકારીઓના જણાવ્યા અનુસાર, કોનાક્રીના દાર એસ સલામ (Dar Es Salam) વિસ્તારમાં રવિવારે વહેલી સવારે લગભગ 2 વાગ્યે ભારે વરસાદ (Heavy Rain) શરૂ થયો હતો. વરસાદના કારણે કચરાનો વિશાળ ઢગલો નબળો પડ્યો અને અચાનક ધસી પડ્યો. કચરા સાથે કાદવ અને અન્ય કાટમાળ નજીક આવેલી ઝૂંપડીઓ પર ફરી વળતાં અનેક લોકો તેમાં ફસાઈ ગયા હતા.

ઘટના બાદ સ્થાનિક તંત્ર દ્વારા તાત્કાલિક રેસ્ક્યૂ ઓપરેશન (Rescue Operation) શરૂ કરવામાં આવ્યું હતું. બચાવકર્મીઓ કાટમાળ હટાવીને દટાયેલા લોકોને શોધી રહ્યા છે. આ દુર્ઘટનામાં ઓછામાં ઓછા 6 લોકો ગંભીર રીતે ઘાયલ થયા હોવાનું પણ જાણવા મળ્યું છે.

સ્થળ ખાલી કરવાની નોટિસ અપાઈ હતી

અધિકારીઓએ જણાવ્યું કે આ કચરા ડમ્પને બંધ કરવાનો નિર્ણય અગાઉથી લેવામાં આવ્યો હતો. લૅન્ડફિલની આસપાસ રહેતા લોકોને સ્થળ ખાલી કરવાની નોટિસ (Eviction Notice) પણ આપવામાં આવી હતી. ઘણા પરિવારો ત્યાંથી અન્ય સ્થળે જતા રહ્યા હતા, પરંતુ દુર્ઘટનાના સમયે હજુ પણ કેટલાક લોકો ઝૂંપડીઓમાં રહેતા હતા.

મૃતકોનો આંકડો વધવાની આશંકા

મળતી માહિતી પ્રમાણે કાટમાળ નીચે હજુ પણ કેટલાક લોકો દટાયેલા હોવાની આશંકા છે. તેથી મૃતકોની સંખ્યા વધવાની શક્યતા વ્યક્ત કરવામાં આવી રહી છે. સ્થાનિક પ્રશાસન અને રેસ્ક્યૂ ટીમો દ્વારા સતત શોધખોળ ચાલી રહી છે.

ગિનીના અધિકારીઓએ અસરગ્રસ્ત પરિવારોને સુરક્ષિત સ્થળે ખસેડવા અને તેમના પુનર્વસન (Rehabilitation)ની વ્યવસ્થા કરવાની ખાતરી આપી છે. પ્રશાસને લોકોને કાટમાળથી દૂર રહેવાની અપીલ કરી છે, કારણ કે વધુ કચરો ધસી પડવાનો ખતરો હજુ પણ યથાવત છે.