VIDEO: ANDARNI VAAT / આઝાદીના દાયકાઓ પછી અંધકારમાંથી મુક્તિ, તમિલનાડુના અય્યનકોલ્લાઈ ગામમાં સોલાર લાઈટથી થયો ઉજાસ!

આઝાદીના આટલા વર્ષો પછી પણ દુર્ભાગ્યવશ દેશના અનેક અંતરિયાળ ગામો આજે પણ વીજળીના સુવિધાથી વંચિત છે, પરંતુ તમિલનાડુના તિરુપત્તુર જિલ્લાના અય્યનકોલ્લાઈ ગામમાંથી આશાનું એક નવું કિરણ સામે આવ્યું છે. આ પહાડી અને દુર્ગમ ગામમાં વીજળીના પરંપરાગત થાંભલા તો નથી પહોંચી શક્યા, પરંતુ હવે સોલાર પેનલ અને સોલાર લાઈટ્સ લગાવવામાં આવી છે. આ નવીનતમ પહેલના કારણે વર્ષોથી અંધકારમાં જીવવા મજબૂર બનેલા ગ્રામજનોના જીવનમાં એક નવો પ્રકાશ પથરાયો છે. ગ્રીડ વિજળીના અભાવ વચ્ચે સોલાર ઊર્જાનો આ વિકલ્પ અપનાવીને ગામના શેરી-મોહલ્લાઓને રોશન કરવામાં આવ્યા છે, જેનાથી રાત્રિના સમયે ગ્રામજનોની અવરજવર ખૂબ જ સુગમ અને સુરક્ષિત બની છે.

 

અય્યનકોલ્લાઈ ગામમાં સોલાર લાઈટ્સ લાગતાં જ સ્થાનિક રહીશો અને ખાસ કરીને બાળકોમાં ભારે ઉત્સાહ અને આનંદનો માહોલ જોવા મળી રહ્યો છે. દ્રશ્યોમાં પણ જોઈ શકાય છે કે રાત પડતાં જ સોલાર લાઈટોથી આખું ગામ ઝળહળી ઊઠે છે. સ્થાનિક લોકોએ આ વ્યવસ્થા બદલ પ્રશાસનનો આભાર માનતા ખુશી વ્યક્ત કરી છે. સોલાર ઊર્જાના કારણે બાળકો હવે રાત્રે પણ અભ્યાસ કરી શકે છે અને જંગલી પ્રાણીઓ તથા ઝેરી જીવજંતુઓના ભયમાંથી લોકોને મુક્તિ મળી છે. આઝાદીના દાયકાઓ બાદ વીજળીના બદલે સૌર ઊર્જા થકી રોશન થયેલું આ ગામ આજે અન્ય વીજળી વિહોણા વિસ્તારો માટે પણ આત્મનિર્ભરતાનું એક ઉત્કૃષ્ટ ઉદાહરણ બન્યું છે.

બ્યૂરો રિપોર્ટ જીએસટીવી