VIDEO: ANDAR NI VAAT/ ચીનના તિબત્તમાં અત્યાચાર વિરૂદ્ધ ધર્મશાલામાં તિબેટિયનોનો ઉગ્ર વિરોધ
છેલ્લું અપડેટ : 04 Jul 2026
હિમાચલ પ્રદેશના ધર્મશાલામાં ન્યૂયોર્કમાં તાજેતરમાં બનેલી આત્મદાહની હૃદયદ્રાવક ઘટનાને લઈને નિર્વાસિત તિબેટિયન સમુદાયમાં ભારે આક્રોશ અને શોકની લાગણી જોવા મળી રહી છે. ચીનની દમનકારી નીતિઓ અને તિબેટિયન ઓળખને ખતમ કરવાના ઈરાદાથી લાગુ કરવામાં આવેલા નવા કાયદાઓના વિરોધમાં મોટી સંખ્યામાં તિબેટિયનો રસ્તા પર ઉતરી આવ્યા હતા. ધર્મશાલાના મેકલોડગંજ ખાતે હજારોની સંખ્યામાં એકઠા થયેલા તિબેટિયન સમુદાયના લોકોએ રેલી કાઢી ચીન વિરોધી સૂત્રોચ્ચાર કર્યા હતા. આ દરમિયાન પ્રદર્શનકારીઓએ ચીનના નવા નિયમોને તિબેટિયન સંસ્કૃતિ પરનો હુમલો ગણાવી તેને તુરંત પાછા ખેંચવાની માંગ કરી હતી. આ વિરોધ પ્રદર્શનમાં મોટી સંખ્યામાં યુવાનો, મહિલાઓ અને વૃદ્ધો જોડાયા હતા, જેઓ તિબેટની આઝાદી અને પોતાની સંસ્કૃતિના જતન માટે કટિબદ્ધ દેખાઈ રહ્યા હતા.
રેલીના અંતે, ન્યૂયોર્કમાં પોતાનું બલિદાન આપનાર તિબેટિયન કાર્યકરને શ્રદ્ધાંજલિ આપવા માટે એક વિશેષ કાર્યક્રમનું આયોજન કરવામાં આવ્યું હતું. પ્રદર્શનકારીઓએ હાથમાં મીણબત્તીઓ અને દીવા પ્રગટાવીને શહીદને ભાવભીની શ્રદ્ધાંજલિ અર્પણ કરી હતી અને તેમની આત્મબલિદાનની ઘટનાને ચીનના અત્યાચાર સામેના પ્રતીક તરીકે ગણાવી હતી. આ પ્રસંગે તિબેટિયન સમુદાયના અગ્રણીઓએ ચીન દ્વારા લાદવામાં આવતા દબાણો અને માનવાધિકારના ઉલ્લંઘન અંગે વૈશ્વિક સમુદાયનું ધ્યાન દોર્યું હતું. તેમણે સ્પષ્ટ કર્યું હતું કે આવી ઘટનાઓ તિબેટની સ્વતંત્રતાની ચળવળને દબાવી શકશે નહીં, પરંતુ લોકોના મનોબળને વધુ મજબૂત બનાવશે. સંપૂર્ણ વાતાવરણ દેશભક્તિના નારા અને તિબેટિયન એકતાના સૂત્રોથી ગુંજી ઉઠ્યું હતું, જે ચીની સરકાર માટે એક મોટો સંદેશ છે કે નિર્વાસિત તિબેટિયનો પોતાના મૂળ અને અસ્તિત્વ માટે લડત ચાલુ રાખશે.
