VIDEO: ANDAR NI VAAT/ હિમાચલમાં ભારે વરસાદનું ઓરેન્જ એલર્ટઃ કિન્નૌરમાં ભૂસ્ખલનથી ભારે તબાહી
છેલ્લું અપડેટ : 03 Jul 2026
હિમાચલ પ્રદેશમાં ચોમાસાના પ્રારંભ સાથે જ હવામાન વિભાગ (IMD) દ્વારા જારી કરાયેલા ઓરેન્જ એલર્ટ વચ્ચે પર્વતીય વિસ્તારોમાં ભારે વિનાશ સર્જાયો છે. શિમલા, કિન્નોર, કુલ્લુ અને મંડી સહિતના પહાડી વિસ્તારોમાં છેલ્લા કેટલાક દિવસોથી અવિરત અને ધોધમાર વરસાદ વરસી રહ્યો છે. આ અતિભારે વરસાદને પગલે આદિવાસી જિલ્લા કિન્નોરના સુરચો, રિસ્પા અને લિપ્પા વિસ્તારોમાં મોડી રાત્રે અચાનક વાદળ ફાટવા જેવી સ્થિતિ સર્જાતાં ભયાનક પૂર (ફ્લેશ ફ્લડ) આવ્યું હતું. પહાડો પરથી ધસી આવેલા પાણીના પ્રચંડ પ્રવાહે નદી-નાળાઓને વહેતા કર્યા છે, જેના કારણે નીચાણવાળા રહેણાક વિસ્તારોમાં ટનબંધ કાદવ-કીચડ અને પથ્થરોનો કાટમાળ જમા થઈ ગયો છે. આ પૂરના કારણે પ્રાદેશિક કનેક્ટિવિટીને ભારે નુકસાન પહોંચ્યું છે, અને રસ્તાઓ પર કાદવનું સામ્રાજ્ય સ્થપાતા સ્થાનિક રહેવાસીઓ ભારે આક્રોશ અને મુશ્કેલીનો સામનો કરી રહ્યા છે.
પૂરના ઓસર્યા બાદ પ્રભાવિત ગામોમાં બચાવ કામગીરી અને સફાઈ અભિયાન યુદ્ધના ધોરણે શરૂ કરવામાં આવ્યું છે. સ્થાનિક ગ્રામજનો અને વહીવટીતંત્રની ટીમો કાદવમાં ફસાયેલા વાહનોને બહાર કાઢવા અને નદી કિનારાના વિસ્તારોને ચોખ્ખા કરવા માટે દિવસ-રાત મહેનત કરી રહ્યા છે. સતત વરસાદના કારણે પહાડો પરથી માટી ધસી પડવાનો ખતરો હજુ પણ તોળાઈ રહ્યો છે, જેના લીધે વ્યૂહાત્મક મહત્વ ધરાવતો હિન્દુસ્થાન તિબેટ રાષ્ટ્રીય ધોરી માર્ગ ચોલિંગ નજીક સંપૂર્ણપણે બંધ થઈ ગયો છે અને સેંકડો વાહનો રસ્તામાં ફસાયા છે. રાજ્ય આપત્તિ વ્યવસ્થાપન સત્તામંડળ દ્વારા નદી કિનારે વસતા લોકોને સુરક્ષિત સ્થળોએ ખસી જવા અને પ્રવાસીઓને આગામી ૨૪ કલાક સુધી ઉચ્ચ પહાડી વિસ્તારોની બિનજરૂરી મુસાફરી ટાળવા માટે કડક એડવાઇઝરી જારી કરવામાં આવી છે. બ્યુરો રિપોર્ટ જીએસટીવી
