VIDEO: IPLમાં વધુ એક ખેલાડીનું નોટ સેલિબ્રેશન, ઉર્વિલ પટેલે ફિફ્ટી પૂર્ણ કર્યા બાદ કાઢી ભાવુક મેસેજવાળી ચિઠ્ઠી
છેલ્લું અપડેટ : 11 May 2026
IPL 2026માં રવિવારે ચેન્નાઈ સુપર કિંગ્સ (CSK) અને લખનઉ સુપર જાયન્ટ્સ (LSG) વચ્ચે રમાયેલી મેચમાં ઉર્વિલ પટેલનું તોફાન જોવા મળ્યું હતું. ચેન્નાઈના ચેપોક સ્ટેડિયમમાં રમાયેલી આ મેચમાં ઉર્વિલ પટેલે પોતાની વિસ્ફોટક બેટિંગથી ઈતિહાસના પાનાઓમાં પોતાનું નામ નોંધાવી દીધું છે. ઉર્વિલે આ મેચમાં માત્ર 13 બોલમાં અડધી સદી ફટકારી હતી.
યશસ્વી જયસ્વાલના રેકોર્ડની બરાબરી
ઉર્વિલ પટેલ હવે IPL ઈતિહાસમાં સંયુક્ત રીતે સૌથી ઝડપી ફિફ્ટી ફટકારનાર બેટ્સમેન બની ગયો છે. તેણે યશસ્વી જયસ્વાલના તે રેકોર્ડની બરાબરી કરી છે, જે જયસ્વાલે 11 મે 2023ના રોજ કોલકાતામાં KKR વિરુદ્ધ 13 બોલમાં બનાવ્યો હતો.
ભાવુક ઉજવણી: "This is for you, Papa"
પોતાની આ ઐતિહાસિક સિદ્ધિ બાદ ઉર્વિલ પટેલે એક ચિઠ્ઠી કાઢીને ભાવુક ઉજવણી કરી હતી. આ ચિઠ્ઠીમાં લખ્યું હતું, “This is for you, Papa.” “સધી, જોગણી, ચેહર, ગોગા અને સિકોતર માતાજીના આશીર્વાદ”
IPL ઈતિહાસની સૌથી ઝડપી ફિફ્ટી:
- ઉર્વિલ પટેલ (CSK): 13 બોલ (2026 વિ. LSG)
- યશસ્વી જાયસ્વાલ (RR): 13 બોલ (2023 વિ. KKR)
- કે.એલ. રાહુલ (PBKS): 14 બોલ (2018 વિ. DC)
- પેટ કમિન્સ (KKR): 14 બોલ (2022 વિ. MI)
- રોમારિયો શેફર્ડ (RCB): 14 બોલ (2025 વિ. CSK)
માત્ર ચોગ્ગા-છગ્ગામાં જ કરી વાત
ઉર્વિલ પટેલે આ મેચમાં કુલ 23 બોલ રમીને 65 રનની તોફાની ઈનિંગ રમી હતી. તેની આ ઈનિંગની ખાસ વાત એ હતી કે તેણે મેદાનની ચારેબાજુ શોટ્સ ફટકાર્યા હતા. ઉર્વિલે પોતાની ઈનિંગમાં 8 છગ્ગા અને 2 ચોગ્ગા ફટકાર્યા હતા. તેના 65 રનમાંથી 56 રન તો માત્ર ચોગ્ગા અને છગ્ગાની મદદથી જ આવ્યા હતા.
CSK માટે પ્લેઓફની આશા જીવંત
પ્લેઓફની રેસમાં ટકી રહેવા માટે ચેન્નાઈ માટે આ મેચ જીતવી ખૂબ જ મહત્ત્વની હતી. લખનૌએ પ્રથમ બેટિંગ કરતા ચેન્નાઈને 204 રનનો મોટો લક્ષ્યાંક આપ્યો હતો. જોકે, ઉર્વિલ પટેલની આક્રમક બેટિંગે મેચને એકતરફી બનાવી દીધી અને CSKનું કામ સરળ કરી દીધું હતું.