IPL 2024ના સૌથી મોંઘા ખેલાડી મિચેલ સ્ટાર્કે ફેંકી અત્યાર સુધીની સૌથી ‘મોંઘી’ ઓવર, પહેલી જ મેચમાં બનાવ્યો શરમજનક રેકોર્ડ

કોલકાતા નાઈટ રાઈડર્સ ભલે IPL 2024ની તેની પ્રથમ મેચ જીતી લીધી હોય, પરંતુ મિશેલ સ્ટાર્કે ચોક્કસપણે તેમની ચિંતાઓ વધારી દીધી છે. KKR એ IPL 2024ની હરાજીમાં 24.75 કરોડ રૂપિયાની મોટી રકમ ખર્ચીને સ્ટાર્કને પોતાની ટીમમાં સામેલ કર્યો હતો. આ સાથે સ્ટાર્ક માત્ર IPL 2024માં જ નહીં પરંતુ IPLના ઈતિહાસનો સૌથી મોંઘો ખેલાડી બની ગયો છે. હરાજીમાં તેમના માટે કુલ 99 બિડ મૂકવામાં આવી હતી, જેમાં KKR છેલ્લી બોલી લગાવીને જીતી ગયું હતું. જો કે આ ફાસ્ટ બોલર માટે સિઝનની પ્રથમ મેચ ખૂબ જ નિરાશાજનક રહી હતી. આ સમયગાળા દરમિયાન સ્ટાર્કે IPL 2024ની સૌથી મોંઘી ઓવર પણ ફેંકી હતી.

સૌથી મોંઘી ઓવર

સનરાઈઝર્સ હૈદરાબાદ સામેની મેચમાં મિચેલ સ્ટાર્કે 4 ઓવરમાં કુલ 53 રન ખર્ચ્યા હતા. આ દરમિયાન તેને એક પણ વિકેટ મળી ન હતી. મિચેલ સ્ટાર્કની IPL કરિયરની આ સૌથી મોંઘી ઓવર પણ છે. સ્ટાર્કે ઇનિંગની 19મી ઓવરમાં પોતાના ક્વોટાની છેલ્લી ઓવર ફેંકી હતી. પ્રથમ 3 ઓવરમાં તેણે અનુક્રમે માત્ર 12, 10 અને 5 રન જ ખર્ચ્યા હતા, પરંતુ છેલ્લી ઓવરમાં 26 રન ખર્ચીને ફિફ્ટી પૂરી કરી હતી. સ્ટાર્કની આ ઓવરમાં કુલ 4 સિક્સર ફટકારવામાં આવી હતી.

મિચેલે વેડફ્યા ટીમના પૈસા

IPLના ઈતિહાસના સૌથી મોંઘા ખેલાડીને આ રીતે શરમજનક રેકોર્ડ બનાવતા જોઇને સોશિયલ મીડિયા પર ચાહકોની પ્રતિક્રિયાનું પૂર આવ્યું હતું. જેમાં લોકો કહી રહ્યા હતા કે મિચેલ સ્ટાર્કે KKR સાથે છેતરપિંડી કરી છે અને ટીમના પૈસા વેડફ્યા છે.