IPL 2025 / વ્યર્થ ગઈ હાર્દિક-તિલકની તોફાની ઈનિંગ્સ, 10 વર્ષ પછી ઘરઆંગણે RCB સામે હાર્યું મુંબઈ
છેલ્લું અપડેટ : 08 Apr 2025
IPL 2025માં ગઈકાલે મુંબઈ ઈન્ડિયન્સ અને રોયલ ચેલેન્જર્સ બેંગલુરુ વચ્ચે એક રોમાંચક મેચ રમાઈ હતી. વાનખેડે સ્ટેડિયમ ખાતે રમાયેલી આ મેચમાં યજમાન મુંબઈ ઈન્ડિયન્સનો 12 રને પરાજય થયો હતો. પ્રથમ બેટિંગ કરતા RCB એ 5 વિકેટ ગુમાવીને 221 રન બનાવ્યા હતા. જવાબમાં, મુંબઈ ઈન્ડિયન્સ 20 ઓવરમાં 9 વિકેટ ગુમાવીને 209 રન જ બનાવી શક્યું હતું. આ રીતે, તિલક વર્માની ઝડપી અડધી સદી અને હાર્દિક પંડ્યાની ધમાકેદાર ઈનિંગ વ્યર્થ ગઈ. આ સાથે RCB ટીમ 10 વર્ષ પછી વાનખેડે ખાતે મુંબઈને હરાવવામાં સફળ રહી. આ પહેલા RCB એ 2015માં મુંબઈ સામે જીત મેળવી હતી.
કૃણાલ પંડ્યાએ છેલ્લી ઓવરમાં કમાલ કરી
તિલક વર્માએ 29 બોલમાં 56 રન બનાવ્યા જ્યારે કેપ્ટન હાર્દિક પંડ્યાએ 15 બોલમાં 3 ચોગ્ગા અને 4 છગ્ગાની મદદથી 42 રન બનાવ્યા હતા. એક સમયે, બંનેએ મુંબઈના ફેન્સને જીતની આશા આપી હતી પરંતુ જોશ હેઝલવુડે હાર્દિકને આઉટ કરીને RCBની ટીમને મેચમાં પાછી લાવી. આ પછી, કૃણાલ પંડ્યાએ છેલ્લી ઓવરમાં 3 વિકેટ લીધી અને RCBને જીત અપાવી. રોયલ ચેલેન્જર્સ બેંગલુરુ તરફથી કૃણાલ પંડ્યાએ સૌથી વધુ 4 વિકેટ લીધી હતી. જ્યારે, યશ દયાલ અને જોશ હેઝલવુડે 2-2 વિકેટ અને ભુવનેશ્વર કુમારે એક વિકેટ લીધી હતી.
આ પહેલા ટોસ હારીને પહેલા બેટિંગ કરવા આવેલી રોયલ ચેલેન્જર્સ બેંગલુરુને પહેલી જ ઓવરમાં મોટો ઝટકો લાગ્યો હતો. ટ્રેન્ટ બોલ્ટે ઓપનર ફિલ સોલ્ટને 4 રનના વ્યક્તિગત સ્કોર પર આઉટ કર્યો. પહેલી વિકેટ વહેલી ગુમાવ્યા બાદ, વિરાટ કોહલીએ દેવદત્ત પડિક્કલ સાથે મળીને ઈનિંગની કમાન સંભાળી અને સ્કોર 95 રન સુધી પહોંચાડ્યો. બીજી વિકેટ માટે બંને વચ્ચે 91 રનની શાનદાર પાર્ટનરશિપ થઈ હતી.
કોહલી-પાટીદારે બેટથી પોતાની તાકાત બતાવી
15મી ઓવરમાં 67 રન બનાવીને વિરાટ કોહલી પવેલિયન પાછો ફર્યો. કોહલી પછી તરત જ લિયામ લિવિંગસ્ટોન પણ શૂન્ય રને આઉટ થઈ ગયો. એક ઓવરમાં બે મોટી વિકેટ ગુમાવ્યા બાદ, કેપ્ટન રજત પાટીદારે જીતેશ શર્મા સાથે મળીને ઝડપથી રન બનાવવાનું શરૂ કર્યું અને ટીમનો સ્કોર 200ની પાર લઈ ગયો. આ દરમિયાન, રજત પાટીદારે પોતાની અડધી સદી પૂર્ણ કરી હતી. પાટીદારની અડધી સદીના આધારે, RCB એ 20 ઓવરમાં 5 વિકેટ ગુમાવીને 221 રન બનાવ્યા હતા. પાટીદારે 64 રનની ઈનિંગ રમી હતી. જીતેશે અણનમ 40 રન બનાવ્યા હતા. મુંબઈ તરફથી હાર્દિક પંડ્યાએ સૌથી વધુ 3 વિકેટ લીધી હતી. આ સિવાય બોલ્ટે 2 વિકેટ લીધી હતી.
