KKRને હરાવીને મુંબઈ ઈન્ડિયન્સે પોઈન્ટ્સ ટેબલમાં લગાવી લાંબી છલાંગ, કોલકાતાની હાલત ખરાબ
છેલ્લું અપડેટ : 01 Apr 2025
IPL 2025ની 12મી મેચમાં મુંબઈ ઈન્ડિયન્સે કોલકાતા નાઈટ રાઈડર્સને 8 વિકેટથી હરાવ્યું હતું. પ્રથમ બેટિંગ કરતા, KKRની ટીમ 116 રનમાં ઓલઆઉટ થઈ ગઈ હતી. મુંબઈના બોલર અશ્વિની કુમારે પોતાની IPL ડેબ્યુ મેચ રમી હતી, જેમાં તેણે 4 વિકેટ લીધી હતી, જેના માટે તેને પ્લેયર ઓફ ધ મેચ પસંદ કરવામાં આવ્યો હતો. ટાર્ગેટ ચેઝ કરતા, મુંબઈ ઈન્ડિયન્સે 13મી ઓવરમાં જીત મેળવી હતી. ઓપનર રિયન રિકલટેને અણનમ 62 રન બનાવ્યા હતા. 8 વિકેટથી મોટી જીત નોંધાવ્યા બાદ, મુંબઈ ઈન્ડિયન્સની નેટ રન રેટમાં નોંધપાત્ર સુધારો થયો છે. ટીમ પોઈન્ટ્સ ટેબલમાં ઉપર આવી ગઈ છે જ્યારે આ હાર બાદ કોલકાતા નાઈટ રાઈડર્સ છેલ્લા સ્થાને સરકી ગયું છે.
IPL 2025માં મુંબઈ ઈન્ડિયન્સની આ પહેલી જીત છે, તે શરૂઆતની બંને મેચ હારી ગયું હતું. જ્યારે KKRએ પહેલી મેચ હાર્યા બાદ બીજી મેચ જીતી હતી. આ તેની ત્રીજી મેચ અને બીજી હાર હતી. બંને ટીમોની સ્થિતિ સમાન છે પરંતુ 43 બોલ બાકી રહેતા 8 વિકેટથી મોટી જીત નોંધાવ્યા બાદ, મુંબઈ ઈન્ડિયન્સની નેટ રન રેટમાં ઘણી સારી થઈ ગઈ છે.
મુંબઈ ઈન્ડિયન્સ 10મા સ્થાનેથી છઠ્ઠા સ્થાને પહોંચી ગયું
આ મેચ પહેલા મુંબઈ ઈન્ડિયન્સ પોઈન્ટ ટેબલમાં છેલ્લા સ્થાને હતું. ટીમે 43 બોલ બાકી રહેતા KKRને 8 વિકેટે હરાવ્યું હતું. ટૂર્નામેન્ટમાં 5 ટીમો છે જેમણે 3માંથી 1 મેચ જીતી છે. પરંતુ બધામાં, મુંબઈ ઈન્ડિયન્સની નેટ રન રેટ સૌથી સારી (+0.309) છે. કોલકાતાને હરાવ્યા બાદ, ટીમ 10મા સ્થાનેથી છઠ્ઠા સ્થાને પહોંચી ગઈ છે.
આ મેચ પહેલા કોલકાતા નાઈટ રાઈડર્સની ટીમ છઠ્ઠા સ્થાને હતી, પરંતુ મેચ હાર્યા બાદ તે 10મા સ્થાને સરકી ગઈ છે. તેની નેટ રન રેટ -1.428 છે, જે બધી ટીમોમાં સૌથી ખરાબ છે.
પોઈન્ટ્સ ટેબલમાં RCB ટોપ પર
રોયલ ચેલેન્જર્સ બેંગલુરુ પોઈન્ટ્સ ટેબલમાં ટોચ પર છે. ટીમે રમેલી બંને મેચ જીતી છે અને તેની નેટ રન રેટ (+2.266) સૌથી વધુ છે. ટોપ 4માં RCBની સાથે દિલ્હી કેપિટલ્સ, લખનૌ સુપર જાયન્ટ્સ, ગુજરાત ટાઈટન્સનો સમાવેશ થાય છે.
