IPL-2025: પંજાબ કિંગ્સે મુંબઈને હરાવીને ફાઈનલમાં કરી દમદાર એન્ટ્રી, RCB અને PBKS વચ્ચે ટાઇટલ માટે મુકાબલો
છેલ્લું અપડેટ : 02 Jun 2025
ઇન્ડિયન પ્રીમિયર લીગને એક નવો ચેમ્પિયન મળવા જઈ રહ્યો છે. IPL 2025 સીઝનના ફાઇનલમાં, બે એવી ટીમો ટકરાશે, જેમણે આજ સુધી ક્યારેય ટાઇટલ જીત્યું નથી. રોયલ ચેલેન્જર્સ બેંગ્લોર 3 જૂન, મંગળવારના રોજ યોજાનારી IPL ફાઇનલમાં પંજાબ કિંગ્સનો સામનો કરશે. ટુર્નામેન્ટની બીજી ક્વોલિફાયર મેચમાં, પંજાબ કિંગ્સે કેપ્ટન શ્રેયસ ઐયરની શાનદાર ઇનિંગના આધારે 5 વખતના ચેમ્પિયન મુંબઈ ઇન્ડિયન્સને 5 વિકેટથી હરાવ્યું. આ સાથે, પંજાબે 11 વર્ષ પછી ફાઇનલમાં પહોંચીને તેની લાંબી રાહનો અંત લાવ્યો.
મુંબઈનો 200 રનનો ગર્વ તૂટી ગયો
અમદાવાદમાં રવિવાર, 1 જૂનની રાત્રે શરૂ થયેલી આ મેચ બીજા દિવસે એટલે કે સોમવાર, 2 જૂનની સવારે વહેલી સમાપ્ત થઈ શકે છે. વરસાદને કારણે મેચ બરાબર અઢી કલાક મોડી શરૂ થઈ અને પહેલા બોલથી છેલ્લા બોલ સુધી ઉત્સાહ ચાલુ રહ્યો. ટોસ હાર્યા બાદ, મુંબઈએ પહેલા બેટિંગ કરવી પડી અને આ વખતે તેમની શરૂઆત ખૂબ જ ખરાબ રહી કારણ કે રોહિત શર્મા ત્રીજા ઓવરમાં આઉટ થઈ ગયો. પરંતુ ટીમના બાકીના બેટ્સમેનોએ આક્રમક ઇનિંગ્સ રમવાનું ચાલુ રાખ્યું અને 203 રનનો મજબૂત સ્કોર બનાવ્યો.
મુંબઈનો શરૂઆતનો લક્ષ્યાંક 200 રન સુધી પહોંચવાનો હતો, જેમાં સૂર્યકુમાર યાદવ (44), તિલક વર્મા (44), નમન ધીર (37) અને જોની બેરસ્ટો (38) એ મુખ્ય ભૂમિકા ભજવી હતી. મુંબઈનો આ સ્કોર એટલા માટે પણ મહત્વપૂર્ણ હતો કારણ કે આ મેચ પહેલા, IPLના 18 વર્ષના ઇતિહાસમાં, આ ટીમ 200 રનના આંકડે પહોંચ્યા પછી ટીમ ક્યારેય પણ હારી નહોતી. દર વખતે આ ટીમે 200 કે તેથી વધુ રન બનાવ્યા પછી વિરોધી ટીમને 200ની અંદર જ રોકીને તેના પર દમદાર જીત દાખવતી હતી, પરંતુ આ વખતે એવું ન થઈ શક્યું અને પહેલી વાર MIને 200 રન કર્યા બાદ પણ હારનો સામનો કરવો પડ્યો.
પંજાબના બેટ્સમેનોની દમદાર ઈનિંગ
આ પહેલા પંજાબે 72 રનમાં ત્રણ વિકેટ ગુમાવી દીધી હતી અને જોશ ઈંગ્લિસ (38) ફોર્મમાં હતો ત્યારે અચાનક તેની વિકેટ પડી તે પંજાબ માટે મોટો ફટકો હતો. પરંતુ આ વખતે પંજાબનો કેપ્ટન ઐય્યર ઇતિહાસ બદલવા માટે કટિબદ્ધ હતો, અને યુવા પંજાબી બેટ્સમેન નેહલ વાઢેરાનો શ્રેષ્ઠ સહયોગ મળ્યો, જે ગત સીઝન સુધી મુંબઈનો ભાગ હતો. બન્ને બેટસમેનોએ સાથે મળીને ૮૪ રનની દમદાર ભાગીદારી નોંધાવી જેણે ટીમને જીતવાની સ્થિતિમાં લાવી દીધી. ત્યારબાદ નેહલ (48) અને શશાંક સિંહ થોડા રનમાં જ આઉટ થઈ ગયા અને મુંબઈ પાસે પાછા ફરવાની તક હતી.
મુંબઈના સ્ટાર બોલર બુમરાહનું પ્રદર્શન નિષ્ફળ
પરંતુ આ વખતે જસપ્રીત બુમરાહ પણ પંજાબને રોકવામાં નિષ્ફળ ગયો અને તેણે 4 ઓવરમાં 40 રન આપીને કોઈ વિકેટ લીધી નહીં. પંજાબના સુકાની ઐયરે 19મી ઓવરમાં 4 છગ્ગા ફટકારીને મેચ દમદાર રીતે જીતી હતી, અને 11 વર્ષ પછી ટીમને ફાઇનલમાં પહોંચાડી. ઐય્યરે 41 બોલનમાં 87 રનની અણનમ ઈનિંગ રમી હતી, જેમાં ૮ છગ્ગા અને ૫ ચોગ્ગાનો સમાવેશ થાય છે.
