IPL 2025: ૩ મેચ માટે ૬ કરોડ? દિલ્હીએ આ વિદેશી ખેલાડી માટે તિજોરી ખોલી, સિઝનની મધ્યમાં એન્ટ્રી

ઇન્ડિયન પ્રીમિયર લીગ 2025ની બાકીની મેચો માટે દિલ્હી કેપિટલ્સમાં એક મોટો ફેરફાર થયો છે. દિલ્હી કેપિટલ્સે બાંગ્લાદેશના ફાસ્ટ બોલર મુસ્તફિઝુર રહેમાનને કરારબદ્ધ કર્યા છે. ઓસ્ટ્રેલિયાના જેક ફ્રેઝર મેકગર્કના સ્થાને મુસ્તફિઝુરનો ટીમમાં સમાવેશ કરવામાં આવ્યો છે. મેકગર્કે વ્યક્તિગત કારણોસર IPLની બાકીની મેચોમાંથી ખસી જવાનો નિર્ણય લીધો છે. દિલ્હી કેપિટલ્સ તરફથી મેકગર્ક માટે પણ આ સિઝન ખાસ નહોતી.

મુસ્તફિઝુર રહેમાનને 6 કરોડ રૂપિયામાં ખરીદ્યો

 દિલ્હી કેપિટલ્સ ટીમે મુસ્તફિઝુર રહેમાનને 6 કરોડ રૂપિયામાં ખરીદ્યો છે. જેક ફ્રેઝર મેકગર્કને દિલ્હી કેપિટલ્સે 6 કરોડ રૂપિયામાં રિટેન કર્યો હતો. આવી સ્થિતિમાં, મુસ્તફિઝુરને તેના સ્થાને આટલી રકમ મળી છે. આ પહેલા પણ રહેમાન દિલ્હી કેપિટલ્સ તરફથી IPLમાં રમી ચૂક્યો છે. આવી સ્થિતિમાં, તે એક રીતે તેમનું ઘર વાપસી રહ્યું છે.

IPL 2025માં, અક્ષર પટેલની આગેવાની હેઠળની દિલ્હી કેપિટલ્સ ટીમે શાનદાર શરૂઆત કરી હતી. શરૂઆતના સતત વિજયો બાદ, દિલ્હી પોતાનો રસ્તો ગુમાવી બેઠું. ભારત અને પાકિસ્તાન વચ્ચેના તણાવને કારણે IPL 2025 બંધ કરવામાં આવી ત્યાં સુધીમાં IPL ટીમોએ 11 મેચ રમી હતી. દિલ્હીના આમાં કુલ ૧૩ પોઈન્ટ છે. ટીમની 12મી મેચ ધર્મશાળામાં પંજાબ કિંગ્સ સાથે રમાઈ હતી, જે પૂર્ણ થઈ શકી નહોતી.

પ્રતિ મેચ ફી લગભગ 2 કરોડ રૂપિયા હશે

આવી સ્થિતિમાં, જો ટીમ પ્લેઓફમાં પહોંચી શકતી નથી, તો રહેમાનની પ્રતિ મેચ ફી લગભગ 2 કરોડ રૂપિયા હશે. કારણ કે જો દિલ્હીનો પંજાબ સાથે ફરીથી મુકાબલો થાય તો લીગ સ્ટેજમાં ફક્ત 3 મેચ બાકી છે. આ ઉપરાંત, જો આપણે IPLમાં મુસ્તફિઝુર રહેમાનના પ્રદર્શનની વાત કરીએ તો, તેણે આ લીગમાં અત્યાર સુધીમાં કુલ 57 મેચ રમી છે. આ મેચોમાં તેના નામે 61 વિકેટ છે. આ ઉપરાંત, મુસ્તફિઝુર તેની રાષ્ટ્રીય ટીમ બાંગ્લાદેશ માટે 106 મેચ રમી છે, જેમાં તેના નામે કુલ 132 વિકેટ છે.