ડેવિડ વોર્નરે કરી ભવિષ્યવાણી, જણાવ્યું કોણ જીતશે IPL 2025 અને ફાઈનલમાં કોને મળશે POTMનો એવોર્ડ
છેલ્લું અપડેટ : 01 Jun 2025
IPLની 18મી સિઝનમાં હવે માત્ર 2 મેચ બાકી છે, ત્યારે દરેક વ્યક્તિના મનમાં એક જ સવાલ છે કે આ વખતે IPLની ટ્રોફી કોણ જીતશે. રોયલ ચેલેન્જર્સ બેંગલુરુ (RCB) ફાઈનલમાં પહોંચી ગયું છે, હવે પંજાબ કિંગ્સ (PBKS) અને મુંબઈ ઈન્ડિયન્સ (MI) માંથી એક ટીમ બીજી ફાઈનલિસ્ટ બનશે. આ પહેલા જ ડેવિડ વોર્નરે IPL વિજેતા વિશે મોટી ભવિષ્યવાણી કરી છે. તેણે જણાવ્યું છે કે તેના મતે કઈ ટીમ ટ્રોફી જીતશે. તેણે એ પણ જણાવ્યું કે ફાઈનલમાં પ્લેયર ઓફ ધ મેચ કોણ બનશે.
ડેવિડ વોર્નરે પોતાની કેપ્ટનશિપમાં સનરાઈઝર્સ હૈદરાબાદ (SRH) ને ચેમ્પિયન બનાવ્યું છે, તે આ વર્ષે મેગા ઓક્શનમાં અનસોલ્ડ રહ્યો હતો. જેના પછી તે PSLમાં રમ્યો હતો. એક ફેને વોર્નરને સોશિયલ મીડિયા પર IPL સંબંધિત પ્રશ્ન પૂછ્યો, "તમને શું લાગે છે કે ટાટા IPL 2025નો ચેમ્પિયન કોણ બનશે?" હવે વોર્નરે આનો જવાબ આપ્યો.
કઈ ટીમ IPL 2025 ટ્રોફી જીતશે?
RCB, જેણે IPLની પહેલી આવૃત્તિથી ટ્રોફી નથી જીતી, તે આ સિઝનમાં ખૂબ જ સારી દેખાઈ રહી છે. ટીમના ખેલાડીઓ દરેક ક્ષેત્રમાં શાનદાર પ્રદર્શન કરી રહ્યા છે, પછી તે બેટિંગ હોય, બોલિંગ હોય કે ફિલ્ડિંગ. RCB એ ક્વોલિફાયર-1 માં PBKSને હરાવ્યું અને ફાઈનલમાં પોતાનું સ્થાન નિશ્ચિત કર્યું.
ડેવિડ વોર્નરે પોતાનો મત જણાવતા કહ્યું કે, "મને લાગે છે કે RCB જીતશે અને જોશ હેઝલવુડ પ્લેયર ઓફ ધ મેચ." IPLની ફાઈનલ મેચ 3 જૂને નરેન્દ્ર મોદી ક્રિકેટ સ્ટેડિયમ ખાતે યોજાશે. તેની બીજી ફાઈનલિસ્ટ ટીમ આજે યોજાનાર ક્વોલિફાયર-2નો વિજેતા બનશે.
RCB એ પોઈન્ટ ટેબલમાં બીજા સ્થાને રહીને પોતાની લીગ સ્ટેજની સફર પૂરી કરી હતી. ટીમે 14 મેચમાંથી 9 મેચ જીતી હતી, તેના પોઈન્ટ્સ ટેબલમાં ટોપ પર રહેલી PBKS જેટલા જ 19 પોઈન્ટ હતા, પરંતુ નેટ રન રેટના કારણે ટીમ પાછળ રહી ગઈ હતી.
વિરાટ કોહલી RCB માટે સૌથી વધુ રન બનાવનાર ખેલાડી છે, તેણે 14 મેચમાં 614 રન બનાવ્યા છે. તે હાલમાં સૌથી વધુ રન બનાવનારા ખેલાડીઓની યાદીમાં 5મા ક્રમે છે, પરંતુ હવે તે ઓરેન્જ કેપ જીતી શકશે નહીં.
જોશ હેઝલવુડ આ સિઝનમાં RCB માટે સૌથી વધુ વિકેટ લેનાર બોલર છે, તેણે 11 મેચમાં 21 વિકેટ લીધી છે. પર્પલ કેપ જીતવા માટે, તેણે ફાઈનલમાં 5 વિકેટ લેવી પડશે, જે મુશ્કેલ છે પણ અશક્ય નથી.
