ક્રિસ્ટિયાનો રોનાલ્ડોની સોશિયલ મીડિયા પર ફોલોઅર્સની સંખ્યા 100 કરોડને પાર, પોતે જ શેર કરી  આપી માહિતી

વિશ્વના મહાન ફૂટબોલરોમાં ક્રિસ્ટિયાનો રોનાલ્ડોનું નામ સામેલ છે. પોર્ટુગલ અને અલ નાસર તરફથી રમતા આ દિગ્ગજ ફૂટબોલરે સોશિયલ મીડિયા પર એક ખાસ રેકોર્ડ બનાવ્યો છે. સોશિયલ મીડિયા પર એક અબજ એટલે કે 100 કરોડ ફોલોઅર્સનો આંકડો સ્પર્શનાર તેઓ પ્રથમ વ્યક્તિ બન્યા. 

39 વર્ષીય રોનાલ્ડોએ એક યુટ્યુબ એકાઉન્ટ બનાવ્યું હતું અને એક અઠવાડિયામાં તેના ફોલોઅર્સની સંખ્યા 50 મિલિયન એટલે કે પાંચ કરોડને પાર કરી ગઈ હતી. આ દરમિયાન તેણે ઘણા રેકોર્ડ તોડ્યા. રોનાલ્ડોના ઇન્સ્ટાગ્રામ પર 639 મિલિયનથી વધુ ફોલોઅર્સ છે, જે સોશિયલ મીડિયા પ્લેટફોર્મ પર તેના 100 કરોડ ફોલોઅર્સનો સૌથી મોટો હિસ્સો છે. માન્ચેસ્ટર યુનાઇટેડ અને રિયલ મેડ્રિડના આ ભૂતપૂર્વ ખેલાડીના ફેસબુક પર 170.5 મિલિયન એટલે કે 17 કરોડ ફોલોઅર્સ છે અને 'X' પર 113 મિલિયન એટલે કે 11 કરોડ ફોલોઅર્સ છે. તેના ચાઈનીઝ પ્લેટફોર્મ વેઈબો અને કુઆશોઉ પર પણ ફોલોઅર્સ છે.

રોનાલ્ડોએ લખ્યું, 'મારા પર વિશ્વાસ કરવા, તમારા સમર્થન માટે અને મારા જીવનનો ભાગ બનવા બદલ તમારો આભાર. શ્રેષ્ઠ હજુ આવવાનું બાકી છે અને સાથે મળીને આપણે જીતવાનું અને ઇતિહાસ રચવાનું ચાલુ રાખીશું. અગાઉ, પોર્ટુગલના આ સ્ટાર ફૂટબોલરે, જેને બેલોન ડી'ઓર માટે શોર્ટલિસ્ટ કરવામાં આવ્યો ન હતો, તેણે ક્રોએશિયા સામેની મેચમાં તેની કારકિર્દીનો રેકોર્ડ 900મો ગોલ કર્યો હતો. 39 વર્ષીય ફૂટબોલરે આ માઈલસ્ટોન હાંસલ કરવાની ઉજવણી એવી રીતે કરી કે જાણે તેણે તેની કારકિર્દીનો પ્રથમ ગોલ કર્યો હોય. પોર્ટુગલની જર્સીમાં આ તેનો 131મો ગોલ હતો. ગોલની ઉજવણી કરતી વખતે રોનાલ્ડો ભાવુક જોવા મળ્યો હતો. તેના 900 ગોલમાંથી અડધા રિયલ મેડ્રિડ માટે આવ્યા છે. આંતરરાષ્ટ્રીય મેચો સિવાય, તેણે સ્પોર્ટિંગ લિસ્બન, માન્ચેસ્ટર યુનાઇટેડ, જુવેન્ટસ અને વર્તમાન ક્લબ અલ નાસર માટે બાકીના ગોલ કર્યા છે.