વિશ્વભરની આ ટ્રેનોમાં સફર કરવા માટે વેચવી પડી શકે છે પ્રોપર્ટી, જાણો તેના રૂટ અને એક વ્યક્તિ માટેનું ભાડું
છેલ્લું અપડેટ : 13 Oct 2025
જો તમે ભારતમાં કોઈને પૂછો કે આરામદાયક મુસાફરી માટે પરિવહનનું સૌથી સસ્તું અને શ્રેષ્ઠ માધ્યમ કયું છે, તો દરેક વ્યક્તિનો જવાબ હશે રેલ્વે. આનું કારણ એ છે કે લાખો લોકો, ધનિકથી લઈને ગરીબ સુધી, ભારતીય રેલ્વે દ્વારા દરરોજ એક જગ્યાએથી બીજી જગ્યાએ મુસાફરી કરે છે. પરંતુ શું તમે જાણો છો કે વિશ્વની સૌથી મોંઘી ટ્રેનો કઈ છે, જેમાં મુસાફરી કરવા માટે તમારે તમારી પ્રોપર્ટી વેચવી પડી શકે છે? આ ટ્રેનોની વિશેષતા એ છે કે તે મહેલોની જેમ શણગારેલી છે, જ્યાં ફાઈન ડાઈનિંગ, સ્પા અને બારીમાંથી દેખાતા દૃશ્યો મુસાફરો માટે એક અનોખો અનુભવ પ્રદાન કરે છે. ચાલો આવી જ કેટલીક ટ્રેન વિશે જાણીએ.
મહારાજા એક્સપ્રેસ (ભારત)
ભારતના ગૌરવ તરીકે ઓળખાતી આ ટ્રેન ઓક્ટોબરથી એપ્રિલ સુધી ચાલે છે. તે 3-રાત/4-દિવસ અને 6-રાત/7-દિવસના પેકેજ ઓફર કરે છે, જે તમને જયપુર, ઉદયપુર, આગ્રા અને વારાણસી જેવા સ્થળોએ લઈ જાય છે. પ્રતિ મુસાફર ભાડાની વાત કરીએ તો તે 6.9 લાખ રૂપિયાથી 22.2 લાખ રૂપિયા સુધી છે. તેની વિશેષતાઓમાં શાહી ઇન્ટીરીયર અને કિલ્લા અને મહેલની ગાઈડેડ ટૂરનો સમાવેશ થાય છે.
ટ્રેન સ્યુટ શિકી-શિમા (જાપાન)
ટોક્યોથી ઉપડતી આ ટ્રેનને વિશ્વની સૌથી એક્સક્લુઝીવ ટ્રેનોમાંથી એક ગણવામાં આવે છે. તે તોહોકુ અને હોક્કાઈદો માટે 2-રાત/3-દિવસ અને 3-રાત/4-દિવસના પેકેજ ઓફર કરે છે. તેનું ભાડું પ્રતિ મુસાફર 16.8 લાખ રૂપિયાથી 19.5 લાખ રૂપિયા સુધી છે. તેની જાપાની ડિઝાઇન, ગ્લાસ લાઉન્જ અને સિઝનલ ગોરમટ મેનુ તેના મુખ્ય આકર્ષણો છે.
વેનિસ સિમ્પલોન-ઓરિએન્ટ-એક્સપ્રેસ (યુરોપ)
રોમાંસ માટે પ્રખ્યાત આ ટ્રેન મુસાફરોને 1920ના દાયકાની ગાડીઓમાં લઈ જાય છે. તે સામાન્ય રીતે પેરિસથી વેનિસ સુધી રાતભર ચાલે છે. ભાડાની વાત કરીએ તો તે પ્રતિ મુસાફર 3.9 લાખ રૂપિયાથી શરૂ થાય છે. તેની વિશેષતાઓમાં ઓલ્ડ વર્લ્ડ ચરમ, લાઈવ મ્યુઝિક અને એલિગંટ ડાઈનિંગનો સમાવેશ થાય છે.
રોવોસ રેલ (સાઉથ આફ્રિકા)
"પ્રાઈડ ઓફ આફ્રિકા" તરીકે ઓળખાતી આ ટ્રેન 3 રાતથી 14 દિવસ સુધીની ટ્રિપ્સ ઓફર કરે છે. તે સાઉથ આફ્રિકા, ઝિમ્બાબ્વે, નામિબિયા અને તાંઝાનિયામાંથી પસાર થાય છે. તેનું ભાડું પ્રતિ મુસાફર 3 લાખ રૂપિયાથી શરૂ થઈને 15 લાખ રૂપિયાથી પણ વધુનું છે. સફારી સ્ટાઇલ ટૂર અને વિન્ટેજ કોચ તેના મુખ્ય આકર્ષણ છે.
બેલમંડ રોયલ સ્કોટ્સમેન (સ્કોટલેન્ડ)
આ લક્ઝરી ટ્રેન સ્કોટિશ હાઇલેન્ડ્સમાંથી પસાર થાય છે, તે 2થી 7 રાતની ટ્રિપ ઓફર કરે છે. તેનું ભાડું પ્રતિ મુસાફર 4.7 લાખ રૂપિયાથી 12 લાખ રૂપિયા સુધી છે. તે આરામદાયક કેબિન, ઓનબોર્ડ સ્પા અને ઓપન-એર ડેક ઓફર કરે છે.
ડેક્કન ઓડિસી (ભારત)
ભારતમાં આ લક્ઝરી ટ્રેનને "ક્રુઝ ઓન વ્હીલ્સ" કહેવામાં આવે છે. તે મહારાષ્ટ્ર, કોંકણ અને રાજસ્થાનમાં 7 રાતની મુસાફરી કરાવે છે. તેનું ભાડું પ્રતિ મુસાફર 7.4 લાખ રૂપિયાથી 17.8 લાખ રૂપિયા સુધી છે. સ્પા, ફાઈન ડાઈનિંગ અને યુનેસ્કો સાઈટ્સની મુલાકાતો તેના મુખ્ય આકર્ષણ છે.
પેલેસ ઓન વ્હીલ્સ (ભારત)
ભારતની સૌથી જૂની લક્ઝરી ટ્રેન માનવામાં આવતી, આ ટ્રેન રાજસ્થાન અને આગ્રામાં 7 રાત અને 8 દિવસની મુસાફરી ઓફર કરે છે. તેનું ભાડું પ્રતિ મુસાફર 3.5 લાખ રૂપિયાથી શરૂ થાય છે. શાહી સજાવટ, રાજસ્થાની આતિથ્ય અને કિલ્લાઓ અને બજારોનો અનુભવ તેને ખાસ બનાવે છે.
આ ટ્રેનોમાં મુસાફરી કેવી રીતે કરવી?
આ મુસાફરીઓ મોંઘી જરૂર છે, પરંતુ જો તમે ઈચ્છતા હોવ તો તેને સસ્તી બનાવી શકાય છે. ટૂંકા રૂટ અથવા નાની કેબિન પસંદ કરવાથી ખર્ચ ઓછો થાય છે. તમે આ ફરતા મહેલોની મુલાકાત લેવા માટે ઓફ- સિઝન ડિસ્કાઉન્ટનો લાભ પણ લઈ શકો છો.
