Trekking in Monsoon / ચોમાસામાં ટ્રેકિંગ કરવા જઈ રહ્યા છો? તો જરૂર રાખો આ બાબતોનું ધ્યાન
છેલ્લું અપડેટ : 21 Jul 2025
જો તમે પણ એવા લોકોમાંથી એક છો જેમને પર્વતો પર જવું ગમે છે, તો કદાચ તમને ટ્રેકિંગ પણ પસંદ હશે. આજકાલ યુવાનો સમય મળતાં જ ટ્રેકિંગ કરવા જાય છે. ટ્રેકિંગ માટે જવું જેટલું સારું લાગે છે, તેટલી જ તૈયારી કરવી મુશ્કેલ છે.
ખાસ કરીને જ્યારે હાલમાં વરસાદની ઋતુ છે, અને છતાં તમે ટ્રેકિંગ માટે જવા માંગતા હોવ, તો આ લેખ તમારા માટે છે. અહીં અમે તમને જણાવીશું કે જો તમે વરસાદની ઋતુમાં ટ્રેકિંગ કરવા જઈ રહ્યા છો, તો કઈ બાબતોનું સૌથી વધુ ધ્યાન રાખવું જોઈએ. જો તમે આ બાબતોને ધ્યાનમાં રાખીને ટ્રેકિંગ કરવા જાઓ છો, તો તમને કોઈપણ પ્રકારની સમસ્યાનો સામનો નહીં કરવો પડે.
વોટરપ્રૂફ બેગ સાથે રાખો
જો તમે વરસાદની ઋતુમાં ટ્રેકિંગ કરવા જઈ રહ્યા છો, તો ચોક્કસપણે વોટરપ્રૂફ બેગ સાથે રાખો. આ ઉપરાંત, આ બેગ પર રેઈન કવર પણ રાખો, જેથી પાણી તમારી બેગમાં ન જાય. જો તમે આ નહીં કરો, તો તમારી બેગ બહારથી ભીની તો થશે જ, પરંતુ તમારા સામાન પણ ભીનો થઈ જશે. જ્યારે વરસાદને કારણે બેગ ભીની થાય છે, ત્યારે તેનું વજન પણ વધી જાય છે.
રેઈનકોટ પહેરો
વરસાદની ઋતુમાં રેઈનકોટને સૌથી વધુ પ્રાધાન્ય આપો. છત્રી ટ્રેકિંગ માટે યોગ્ય નથી. છત્રી પકડીને ટ્રેકિંગ કરવું મુશ્કેલ બની શકે છે, તેથી હળવા અને ટકાઉ રેઈનકોટ તમારી સાથે રાખો. રેઈનકોટ તમને વરસાદથી બચાવશે અને તમારા કપડા પણ ભીના થવાથી બચી જશે.
યોગ્ય ફૂટવેર પહેરો
ટ્રેકિંગ કરતી વખતે ક્યારેય નવા શૂઝ ન પહેરો. એવા શૂઝ જ પહેરો જે પહેરવામાં તમને આરામદાયક લાગે. ધ્યાનમાં રાખો કે ભીની અને લપસણી જમીન પર સ્લિપ થવાનું જોખમ વધારે છે, તેથી વરસાદમાં ટ્રેકિંગ કરતી વખતે હંમેશા મજબૂત પકડવાળા વોટરપ્રૂફ શૂઝ પહેરો.
મેપ સેવ કરીને રાખો
ટ્રેકિંગ દરમિયાન પર્વતોમાં નેટવર્ક મેળવવું ખૂબ મુશ્કેલ બની જાય છે. તેથી ગૂગલ મેપ્સ સેવ કરીને રાખો. નેટવર્ક ન હોય ત્યારે ઓફલાઈન મેપ ખૂબ ઉપયોગી છે. આ ઉપરાંત, હેડલેમ્પ અથવા ટોર્ચ અને વધારાની બેટરી રાખો, જેથી અંધારામાં મુશ્કેલીનો સામનો ન કરવો પડે.
હવામાન અંગે જાણો
વરસાદની ઋતુમાં ટ્રેકિંગ કરવા માટે નીકળો તે પહેલા હવામાન જરૂર ચેક કરો. કોઈ જગ્યાએ ભૂસ્ખલન તો નથી થયુંને તે જોવા માટે સમાચાર પણ જોઈ લો. આવા સમયે હવામાન સારું હોવું ખૂબ જ મહત્ત્વપૂર્ણ છે. જો ભારે વરસાદની શક્યતા હોય, તો ટ્રેકિંગ પર જવાનું મુલતવી રાખવું વધુ સારું રહેશે.
ફર્સ્ટ એઈડ કીટ મહત્ત્વપૂર્ણ છે
ટ્રેકિંગ દરમિયાન ઈજા, પગ મચકોડાઈ જવો અથવા જંતુના કરડવા જેવી સમસ્યાઓ ઘણીવાર સામે આવે છે, આવી સ્થિતિમાં ફર્સ્ટ એઈડ કીટ ખૂબ જ મહત્ત્વપૂર્ણ છે. જરૂરિયાત સમયે તે તમારા માટે ઉપયોગી થશે. આ કીટમાં સ્પ્રે,કેટલીક દવાઓ, ગરમ પાટો વગેરે જેવી વસ્તુઓ રાખો.
