શું શિયાળામાં પણ ત્વચા પર દેખાવા લાગે છે પિમ્પલ્સ? તો ધ્યાનમાં રાખો આ બાબતો

શિયાળાની ઋતુમાં ત્વચાની સંભાળ ખૂબ જ જરૂરી છે. ઠંડા હવામાનમાં, ત્વચામાંથી મોઇશ્ચર ઓછું થઈ જાય છે. આવી સ્થિતિમાં, જ્યારે ત્વચા ડ્રાય થઈ જાય છે, ત્યારે પોર્સ બંધ થવા લાગે છે. જેના કારણે ત્વચા યોગ્ય રીતે સાફ નથી થતી. સ્કિન એક્સપર્ટનું કહેવું છે કે જ્યારે ચહેરા પરથી ધૂળ અને ગંદકી સાફ ન થાય તો પિમ્પલ્સ દેખાવા લાગે છે.

આ પણ વાંચો: Beauty Tips / શિયાળામાં ભૂલથી પણ તમારા સ્કિન કેર રૂટીનમાં આ વસ્તુઓનો ન કરો સમાવેશ

શિયાળાની સિઝન ચાલી રહી છે પરંતુ કેટલાક લોકોને આ સિઝનમાં પિમ્પલ્સ થવા લાગે છે. પિમ્પલ્સ દેખાવા પાછળ ખાવાની ટેવ પણ જવાબદાર હોય છે. કારણ કે શિયાળામાં આપણે ખૂબ જ ઓઈલી અને મસાલેદાર ખોરાક ખાવાનું શરૂ કરીએ છીએ, જેની અસર ત્વચા પર જોવા મળે છે. ચાલો જાણીએ કે શિયાળામાં દેખાતા પિમ્પલ્સથી કેવી રીતે બચી શકાય.

ચહેરાને મોઇશ્ચરાઇઝ કરો

શિયાળામાં ત્વચા વધુ ડ્રાય થઈ જાય છે. આને કારણે, ત્વચામાં તેલનું સંતુલન બગડી જાય છે, જેના કારણે પિમ્પલ્સ થાય છે. તેથી ચહેરાને મોઇશ્ચરાઇઝ કરવો ખૂબ જ જરૂરી છે. આ માટે હળવા નોન-કોમેડોજેનિક મોઇશ્ચરાઇઝરનો ઉપયોગ કરો.

ચહેરાને સ્વચ્છ રાખો

શિયાળામાં ત્વચા ડ્રાય હોવા છતાં ચહેરા પર પિમ્પલ્સની સમસ્યા રહે છે. ત્વચાના પોર્સમાં જમા થયેલી ધૂળ, તેલ અને ગંદકી પિમ્પલ્સનું કારણ બની શકે છે. આવી સ્થિતિમાં દિવસમાં બે વાર માઈલ્ડ ફેસ વોશથી ચહેરો ધોવો જરૂરી છે. તે ત્વચાને તાજગી આપે છે અને ગંદકી દૂર કરીને ત્વચાને સ્વચ્છ રાખે છે.

ચહેરાને વારંવાર સ્પર્શ કરશો નહીં

તમારા ચહેરાને વારંવાર સ્પર્શ કરવાનું ટાળો, આમ કરવાથી હાથમાંથી ગંદકી અને બેક્ટેરિયા ત્વચા પર એકઠા થઈ શકે છે, જેનાથી પિમ્પલ્સ વધી શકે છે. ચહેરાને ફક્ત સ્વચ્છ હાથથી જ સ્પર્શ કરો અને પિમ્પલ્સને ફોડવાનો પ્રયાસ ન કરો કારણ કે તેનાથી ઇન્ફેકશન વધી શકે છે.

લીમડાનું પાણી

લીમડાનું પાણી પિમ્પલ્સને દૂર કરવામાં પણ મદદ કરી શકે છે. આ માટે સૌ પ્રથમ લીમડાના થોડા પાન લો અને તેને પાણીમાં ઉકાળો. પાણી ઉકળ્યા પછી તેને ગાળીને સ્પ્રે બોટલમાં ભરી લો. આ લીમડાના પાણીનો દિવસમાં ત્રણ વખત ચહેરા પર સ્પ્રે કરવાથી ફાયદો થાય છે.

ખાસ નોંધ: આ સામાન્ય માહિતી છે, વ્યક્તિગત સલાહ નથી. દરેક વ્યક્તિની જરૂરિયાતો અલગ-અલગ હોય છે. કોઈપણ વસ્તુનો ઉપયોગ કરતા પહેલા નિષ્ણાતની સલાહ લો. કોઈપણ વસ્તુના ઉપયોગથી થતા નુકસાન માટે GSTV જવાબદાર રહેશે નહીં.