VIDEO: દિલ્હીમાં યમુનાનું જળસ્તર 207.33 મીટરે પહોંચ્યું, 2013નો રેકોર્ડ તોડ્યો; અનેક વિસ્તારો પાણીમાં ગરકાવ
છેલ્લું અપડેટ : 03 Sept 2025
દિલ્હીમાં યમુના નદીના જળસ્તરમાં સતત વધારો થવાને કારણે પરિસ્થિતિ વધુ ખરાબ થઈ રહી છે. બુધવારે સાંજ સુધીમાં પાણીનું સ્તર 207.33 મીટર સુધી પહોંચી ગયું હતું, જે 2013 ના રેકોર્ડ સ્તરને વટાવી ગયું છે. વધતા જતા પાણીના પ્રકોપની અસર રાહત શિબિરો પર પણ જોવા મળી છે. યમુના બજાર વિસ્તારમાં સ્થાપિત રાહત શિબિરોમાં પાણી ઘૂસી ગયું છે. પૂરગ્રસ્ત વિસ્તારોમાંથી અગાઉ અહીં લાવવામાં આવેલા લોકોને હવે અન્ય સલામત સ્થળોએ ખસેડવામાં આવી રહ્યા છે. વહીવટીતંત્રે સમગ્ર વિસ્તારને ખાલી કરાવવાની પ્રક્રિયા શરૂ કરી દીધી છે.
કેન્દ્રીય જળ પંચે માર્ગદર્શિકા જારી કરી
દિલ્હીમાં પૂરની સ્થિતિને ધ્યાનમાં રાખીને CWC એ બુધવારે એક નવી એડવાઈઝરી જારી કરી છે. પંચે ચેતવણી આપતા કહ્યું કે, આજે રાત્રે 8 વાગ્યા સુધીમાં યમુના નદીનું જળસ્તર 207.40 મીટર સુધી પહોંચી શકે છે. આ સ્તર ભયજનક લેવલથી ખૂબ નજીક છે, જેના કારણે રાજધાનીના નીચાણવાળા વિસ્તારોમાં પૂરનું જોખમ વધુ વધ્યું છે.
હાલમાં, યમુનાનું પાણીનું સ્તર સતત વધી રહ્યું છે અને ઘણા નીચાણવાળા વિસ્તારોમાં ભરાયું છે. વહીવટીતંત્રે લોકોને સાવધ રહેવા અને નદી કિનારે રહેતા પરિવારોને સુરક્ષિત સ્થળોએ જવા અપીલ કરી છે. આ ઉપરાંત, રાહત અને બચાવ ટીમો પણ એલર્ટ મોડ પર છે. રાત્રે 8 વાગ્યા પછી પણ પાણીનું સ્તર વધી શકે છે, ઘટી શકે છે અથવા સ્થિર રહી શકે છે. જોકે, કમિશને એ પણ સ્પષ્ટ કર્યું છે કે વઝીરાબાદ અને ઓખલા બેરેજમાંથી છોડવામાં આવતા પાણીના જથ્થાના આધારે આ આગાહી વધુ પ્રભાવિત થઈ શકે છે.
યમુનાના પાણીના સ્તરે રેકોર્ડ તોડી નાખ્યો
2023 - 208.66 મીટર
1978 - 207.49 મીટર
2025 - 207.33 મીટર (સાંજે 6 વાગ્યે)
2013 - 207.32 મીટર
દિલ્હી પોલીસે ટ્રાફિક એલર્ટ જારી કર્યું
દિલ્હી પોલીસે ટ્રાફિક અંગે પણ એલર્ટ જારી કરતા કહ્યું કે, આઉટર રિંગ રોડ પર મજનુ કા ટીલાથી સલીમગઢ બાયપાસ સુધી ટ્રાફિક પ્રભાવિત છે. ઘણી જગ્યાએ ડાયવર્ઝન ગોઠવવામાં આવ્યા છે. દિલ્હી ટ્રાફિક પોલીસે મુસાફરોને વૈકલ્પિક માર્ગો અપનાવવા અને સૂચનાઓનું પાલન કરવાની અપીલ કરી છે.
CWCના જણાવ્યા મુજબ છેલ્લા 24 કલાકમાં ઉપરના રાજ્યોમાં ભારે વરસાદ પડવાને કારણે યમુનામાં પાણીનો પ્રવાહ ઝડપથી વધ્યો છે. હવામાન વિભાગે આગામી બે દિવસ વરસાદ માટે ઓરેન્જ એલર્ટ પણ જારી કર્યું છે. દિલ્હી સરકારે કહ્યું છે કે યમુના કિનારે વસેલા વિસ્તારોમાંથી લોકોને સ્થળાંતર કરવાની તૈયારીઓ કરવામાં આવી રહી છે. હેલ્પલાઇન નંબરો જારી કરવામાં આવ્યા છે.
