VIDEO: 'જ્યાં તર્ક અને તથ્ય હોય, ત્યાં તોફાનની જરૂર નથી', સંસદના ચોમાસુ સત્ર પહેલાં PM મોદીનું નિવેદન
છેલ્લું અપડેટ : 20 Jul 2026
નવી દિલ્હી: સંસદના ચોમાસુ સત્ર (Monsoon Session) ની શરુઆત પહેલાં પ્રધાનમંત્રી નરેન્દ્ર મોદીએ મીડિયાને સંબોધિત કરતા આ સત્રને અત્યંત ઐતિહાસિક ગણાવ્યું હતું. વિપક્ષી દળોને સકારાત્મક વલણ અપનાવીને સદનની કાર્યવાહી સુચારુ રીતે ચલાવવામાં સહયોગ આપવા અપીલ કરતાં પીએમ મોદીએ કહ્યું હતું કે, "જ્યાં તર્ક હોય છે... તથ્ય હોય છે, ત્યાં તોફાનની જરૂર નથી હોતી."
"ચોમાસું પ્રો-એક્ટિવ રહે અને સત્ર પ્રોડક્ટિવ રહે"
પીએમ મોદીએ જણાવ્યું હતું કે, "ચોમાસું હોય કે ચોમાસુ સત્ર, જો બંને પ્રો-એક્ટિવ (Pro-active) રહે તો ખૂબ જ પ્રોડક્ટિવ (Productive) નીવડે છે. અને જ્યારે બંને પ્રોડક્ટિવ હોય ત્યારે દેશ અને દરેક જીવમાત્રનું કલ્યાણ થાય છે. તેથી જ આપણે પ્રાર્થના કરીએ છીએ કે ચોમાસું પણ સક્રિય રહે અને સત્ર પણ ઉત્પાદક રહે."
તેમણે ઉમેર્યું કે પાછલા એક મહિનામાં ભારતે રાષ્ટ્રીય, આંતરરાષ્ટ્રીય અને અંતરિક્ષ ક્ષેત્રે અનેક સિદ્ધિઓ હાંસલ કરી છે. તાજેતરમાં જ ભારતીય યુવાનોના એક સ્ટાર્ટ-અપ (Start-up) એ પણ અંતરિક્ષ ક્ષેત્રે મોટી ઉપલબ્ધિ મેળવી છે જે દેશ માટે ગર્વની ક્ષણ છે.
ચોમાસુ સત્રમાં રજૂ થઈ શકે છે આ મહત્વપૂર્ણ બિલ
કેન્દ્રીય સંસદીય કાર્ય મંત્રી કિરન રિજિજુના જણાવ્યા મુજબ, ૨૦ જુલાઈ ૨૦૨૬થી શરૂ થયેલું આ સત્ર ૧૩ ઓગસ્ટ ૨૦૨૬ સુધી ચાલશે. ૨૫ દિવસના આ સત્રમાં કુલ ૧૯ બેઠકો યોજાશે. આ દરમિયાન સરકાર નીચે મુજબના મહત્વના વિધેયક (Bills) રજૂ કરી શકે છે:
૧. ઇનકમ ટેક્સ સુધારા વિધેયક ૨૦૨૬ (Income Tax Amendment Bill 2026): અગાઉ બહાર પાડવામાં આવેલા વટહુકમનું સ્થાન લેશે.
૨. સુપ્રીમ કોર્ટ સુધારા વિધેયક ૨૦૨૬ (Supreme Court Amendment Bill 2026): સર્વોચ્ચ અદાલતમાં ન્યાયાધીશોની સંખ્યા ૩૩ થી વધારીને ૩૭ કરવામાં આવશે.
૩. રાષ્ટ્રીય સન્માનના અપમાન અટકાવ સુધારા વિધેયક ૨૦૨૬ (Prevention of Insults to National Honour Amendment Bill 2026): રાષ્ટ્રીય ગીત ‘વંદે માતરમ’ ને કાનૂની સંરક્ષણ અપાશે.
૪. જન્મ અને મૃત્યુ નોંધણી સુધારા વિધેયક ૨૦૨૬ (Registration of Births and Deaths Amendment Bill 2026): નોંધણીમાં વિલંબ પર દંડ અને નિયમો કડક બનાવવામાં આવશે.
૫. એમએસએમઈ વિકાસ સુધારા વિધેયક ૨૦૨૬ (MSME Development Amendment Bill 2026): નાના અને મધ્યમ ઉદ્યોગોને નાણાકીય રાહત આપવા અને વેપાર સરળ બનાવવા સુધારા કરાશે.
૬. વિદેશી ફાળો સુધારા વિધેયક ૨૦૨૬ (Foreign Contribution Amendment Bill 2026): વિદેશી ભંડોળના ઉપયોગ પર કડક નજર રાખવામાં આવશે.
૭. વિકસિત ભારત શિક્ષણ અધિષ્ઠાન વિધેયક ૨૦૨૫ (Viksit Bharat Shiksha Adhisthan Bill 2025): UGC, AICTE અને NCTE ના સ્થાને એક જ સિંગલ રેગ્યુલેટરી ઓથોરિટી (Single Regulatory Authority) ની રચના કરાશે.
