VIDEO: "E20 ઈંધણથી વાહનો બગડી રહ્યા છે, વડાપ્રધાન તુરંત હસ્તક્ષેપ કરે": ધર્મેન્દ્ર પ્રધાનના રાજીનામા બાદ કેજરીવાલની મોટી માંગ

આમ આદમી પાર્ટી (AAP)ના રાષ્ટ્રીય સંયોજક અર્વિંદ કેજરીવાલે કેન્દ્ર સરકાર પર આકરા પ્રહાર કરતા જણાવ્યું છે કે દેશના યુવાનોની તાકાતે સરકારને ઝુકવા મજબૂર કરી છે. આ સાથે જ તેમણે ધર્મેન્દ્ર પ્રધાનના રાજીનામાનો ઉલ્લેખ કરીને વડાપ્રધાન પાસે E20 ઈંધણ (E20 Fuel)ના મુદ્દે પણ તાત્કાલિક હસ્તક્ષેપ કરવાની માંગ કરી છે.

પત્રકારોને સંબોધતા અર્વિંદ કેજરીવાલે જણાવ્યું હતું કે, "દેશના યુવાનોએ એક અહંકારી સરકારને ઝુકવા માટે મજબૂર કરી દીધી છે અને ધર્મેન્દ્ર પ્રધાનને જનતા સમક્ષ રાજીનામું આપવું પડ્યું છે. હું વડાપ્રધાનને વિનંતી કરું છું કે તેઓ આ તકનો ઉપયોગ કરીને E20 ઈંધણ અંગેની બાબત પર પણ સ્પષ્ટતા કરે. આ ઈંધણના કારણે લોકોને ભારે મુશ્કેલી પડી રહી છે અને તેમના વાહનો બગડી રહ્યા છે."

તેમણે આગળ ઉમેર્યું કે, "તેથી, હું વડાપ્રધાનને વિનંતી કરું છું કે આ મુદ્દો વધુ વકરે તે પહેલાં તેઓ આગળ આવે અને તેનો ઉકેલ લાવે. આ બાબતે સૌને એકમંચ પર લાવવા માટે અમે આ શનિવારે 'નેશનલ ટાઉનહોલ અગેન્સ્ટ E20' (E20 વિરુદ્ધ રાષ્ટ્રીય ટાઉનહોલ)નું આયોજન કરી રહ્યા છીએ. અમને આ કાર્યક્રમમાં હજારો લોકો ભાગ લેશે તેવી અપેક્ષા છે."

કાર્યક્રમની વિગતો આપતાં તેમણે કહ્યું કે, "આ કાર્યક્રમ બપોરે 12.00 વાગ્યે શરૂ થશે. દિલ્હી અને નજીકના શહેરોમાં રહેતા લોકો જે પ્રત્યક્ષ રીતે હાજરી આપી શકે છે, તેમણે સવારે 11.30 વાગ્યા સુધીમાં 'કોન્સ્ટિટ્યુશન ક્લબ' પહોંચી જવું. દિલ્હી બહારના લોકો જે રૂબરૂ આવી શકતા નથી, તેઓ ઓનલાઈન જોડાઈ શકે છે. ઓનલાઈન જોડાવા માટે 8588833212 નંબર પર વ્હોટ્સએપ (WhatsApp) મેસેજ કરવાનો રહેશે, જેથી શુક્રવાર સાંજ સુધીમાં લિંક મોકલી દેવાશે. શનિવારે સવારે 11.30 પછી તે લિંક પર ક્લિક કરીને ઓનલાઈન જોડાઈ શકાશે."

અંતમાં AAP સુપ્રીમોએ જણાવ્યું કે, "અમે આશા રાખીએ છીએ કે આ મુદ્દા સાથે જોડાયેલા નિષ્ણાતો, પીડિતો અને રસ ધરાવતા તમામ લોકોને એક જ મંચ પર લાવી શકીએ. અમે દરેકને પોતાની વાત રજૂ કરવાની તક આપીશું અને સરકારને E20 નીતિ પાછી ખેંચવા મજબૂર કરવા માટે ભવિષ્યની રણનીતિ નક્કી કરીશું."