VIDEO: ઉત્તરાખંડના ધરાલીમાં પૂર આવ્યાના અમુક કલાકમોમાં જ બીજું વાદળ ફાટ્યું
છેલ્લું અપડેટ : 06 Aug 2025
ઉત્તરાખંડના ધરાલી ગામમાં વાદળ ફાટ્યા પછી આવેલા વિનાશક પૂરના થોડા કલાકો પછી, મંગળવારે બપોરે ઉત્તરકાશી જિલ્લામાં સુખી ટોપ પર બીજુ વાદળ ફાટ્યું, જેના કારણે તબાહીનો બીજો દોર શરૂ થયો. અચાનક આવેલા પૂરમાં ઘણા ઘરો કાં તો નુકસાન પામ્યા અથવા તબાહ થઈ ગયા. થોડા કલાકોમાં બનેલી આ બે આફતોએ સમગ્ર પ્રદેશમાં ગભરાટ ફેલાવ્યો છે. ધારાલીની ઘટનામાં ઓછામાં ઓછા ચાર લોકોએ જીવ ગુમાવ્યા અને ઘણા લોકો ગુમ છે.
ભારતીય સેનાના જણાવ્યા અનુસાર, ધરાલી નજીક વાદળ ફાટવાની ઘટના ગંગોત્રી યાત્રા માર્ગ પરના મુખ્ય સ્ટોપ હર્ષિલ નજીક ખિરગઢ વિસ્તારમાં બની હતી. બપોરે લગભગ 1:40 વાગ્યે, પથ્થરો, કાટમાળ અને કાદવથી રસ્તામાં પડેલા ઘરો, દુકાનો, હોમસ્ટે અને હોટલો તૂટી પડ્યા હતા.
જિલ્લા આપત્તિ વ્યવસ્થાપન અધિકારી શાર્દુલ ગુસૈને જાનહાનિની પુષ્ટિ કરી. તેમણે કહ્યું, ચાર લોકોના મોત થયાની માહિતી તેમને મળી છે. જિલ્લા વહીવટીતંત્ર, પોલીસ, રાષ્ટ્રીય આપત્તિ પ્રતિભાવ દળ (NDRF), રાજ્ય આપત્તિ પ્રતિભાવ દળ (SDRF) અને સેનાની બચાવ ટીમો સ્થળ પર તૈનાત કરવામાં આવી છે અને બચાવ કામગીરી ચાલુ છે.
જો કે, ઘણાં લોકો ગુમ થયા હોવાની પણ આશંકા છે, બચાવ ટીમો હજુ પણ કામ કરી રહી છે. અધિકારીઓએ જણાવ્યું હતું કે, મૂલ્યાંકન ટીમો અસરગ્રસ્ત વિસ્તારોમાંથી પાછા ફરશે ત્યારે જ કેટલુ નુકસાન થયુ છે એ સ્પષ્ટ થશે. પ્રારંભિક અહેવાલો સૂચવે છે કે ખીર ગંગા નાળાના ઉપરના ભાગમાં વાદળ ફાટવાને કારણે પૂર આવ્યું હતું.
મુખ્યમંત્રી પુષ્કર સિંહ ધામીએ પરિસ્થિતિ પર દુઃખ વ્યક્ત કર્યું
ઉત્તરાખંડના મુખ્યમંત્રી પુષ્કર સિંહ ધામીએ પરિસ્થિતિ પર દુઃખ વ્યક્ત કર્યું અને કહ્યું કે તેઓ પરિસ્થિતિ પર નજીકથી નજર રાખી રહ્યા છે. તેમણે કહ્યું, 'ઉત્તરાકાશીમાં જાનમાલનું નુકસાન દુઃખદ છે. મેં જિલ્લા વહીવટીતંત્રને તાત્કાલિક અને સંકલિત બચાવ અને રાહત કામગીરી સુનિશ્ચિત કરવા નિર્દેશ આપ્યો છે.'
'બચાવ કામગીરી યુદ્ધના ધોરણે ચાલુ રાખવી જોઈએ'
કેન્દ્રીય ગૃહમંત્રી અમિત શાહે પણ મુખ્યમંત્રી પુષ્કર સિંહ ધામીને ફોન કરીને પરિસ્થિતિનો તાગ મેળવ્યો હતો. આ દરમિયાન અમિત શાહે જાનમાલના નુકસાન પર શોક વ્યક્ત કર્યો અને રાજ્યને સંપૂર્ણ સહાયની ખાતરી આપી. અધિકારીઓના જણાવ્યા અનુસાર, અમિત શાહે કહ્યું કે કેન્દ્ર સરકાર ઉત્તરાખંડ સાથે સંપૂર્ણપણે ઉભી છે અને યુદ્ધના ધોરણે બચાવ કામગીરી ચાલુ રાખવા નિર્દેશ આપ્યો છે. વધારાની ટીમો અને હેલિકોપ્ટર તૈયાર છે, જ્યારે વિસ્થાપિત લોકો માટે સલામત વિસ્તારોમાં રાહત શિબિરો સ્થાપિત કરવામાં આવી રહ્યા છે.