VIDEO: "'જેલમાં ગેંગસ્ટરોને VIP સેવા અને સવાલો પૂછનારા પર થર્ડ ડિગ્રી!' ભગવંત માન સરકારની હકાલપટ્ટીની કોંગ્રેસે કરી માંગ

પંજાબના સંગરૂરમાં ગુલઝાર સિંહ નામના વ્યક્તિની કથિત આત્મહત્યા અને ગેંગસ્ટરમાંથી રાજકારણી બનેલા ગુરપ્રીત સિંહ સેખોંના આમ આદમી પાર્ટી (AAP)માં પ્રવેશને લઈને રાજ્યમાં ભારે રાજકીય ગરમાવો આવી ગયો છે. પંજાબ પ્રદેશ કોંગ્રેસના કાર્યકારી પ્રમુખ રાજકુમાર વેરકાએ ભગવંત માન સરકાર સામે આકરા પ્રહારો કરતાં સરકારને તાત્કાલિક બરતરફ કરવાની માગ ઉઠાવી છે.

'નશા સામે સવાલ ઉઠાવનારા પર અત્યાચાર'

સંગરૂરની ઘટના અંગે બોલતાં રાજકુમાર વેરકાએ ગંભીર આક્ષેપ કર્યો હતો કે, "પંજાબમાં ડ્રગ્સની સમસ્યા પર અવાજ ઉઠાવનાર કોઈપણ વ્યક્તિ સાથે ક્રૂરતા આચરવામાં આવે છે અને તેને સજા આપવામાં આવે છે. ગઈકાલે જ સંગરૂરમાં એક વ્યક્તિએ આત્મહત્યા કરી અને તેના માટે આ સરકારને જવાબદાર ઠેરવી. ભગવંત માનની રેલીમાં માત્ર એક પ્રશ્ન પૂછવાની કોશિશ કરનાર વ્યક્તિ પર 'થર્ડ ડિગ્રી' અત્યાચાર ગુજારવામાં આવ્યો અને શાબ્દિક રીતે તેના ઘા પર મીઠું ભભરાવવામાં આવ્યું."

તેમણે ઉમેર્યું કે કોંગ્રેસ આ મામલે પંજાબ સરકાર પાસેથી જવાબ માંગી રહી છે અને રાજ્યપાલ સમક્ષ સરકારને તાત્કાલિક બરતરફ કરવાની માંગ કરે છે. તેમણે જણાવ્યું કે જનતાનો અવાજ રાજ્યપાલ સુધી પહોંચાડવા માટે તેઓ એકઠા થઈ રહ્યા છે, પરંતુ સરકારે બેરિકેડ લગાવીને તેમને અટકાવવાનો પ્રયાસ કર્યો છે.

જેલમાંથી ગેંગસ્ટરોનું સંચાલન અને AAPમાં એન્ટ્રી પર સવાલ

ગેંગસ્ટરમાંથી રાજકારણી બનેલા ગુરપ્રીત સિંહ સેખોંના 'આપ'માં પ્રવેશ પર આકરા પ્રહારો કરતાં વેરકાએ કહ્યું કે, "આ સરકાર ખુલ્લેઆમ ગેંગસ્ટરોને સંરક્ષણ આપી રહી છે. જેલમાં તેમને સન્માનિત મહેમાનોની જેમ રાખવામાં આવે છે, મોબાઈલ ફોન સહિતની તમામ સુવિધાઓ પૂરી પાડવામાં આવે છે અને જેલની ચારદીવારીમાંથી જ મુક્તપણે વાતચીત કરવા, ખંડણી માંગવા તેમજ ગુનાહિત પ્રવૃત્તિઓ ચલાવવાની છૂટ અપાય છે. આ કેવી સરકાર છે? આવી સરકારને સત્તામાં રહેવાનો કોઈ અધિકાર નથી, તેને તાત્કાલિક વિસર્જિત કરી દેવી જોઈએ."