મધ્ય પૂર્વમાં તણાવ વચ્ચે UAE ના રાષ્ટ્રપતિ દિલ્હી પહોંચ્યા, PM MODIએ એરપોર્ટ પર કર્યું ભવ્ય સ્વાગત 

UAE ના રાષ્ટ્રપતિ શેખ મોહમ્મદ બિન ઝાયેદ અલ નાહ્યાન સોમવારે સાંજે ભારત પહોંચ્યા છે. PM MODIએ એરપોર્ટ પર તેમનું સ્વાગત કર્યું. બંને નેતાઓના ફોટા પણ સામે આવ્યા છે. શેખ મોહમ્મદ બિન ઝાયેદ અલ નાહયાન માત્ર બે કલાક માટે ભારત આવ્યા છે. પીએમ મોદી સાથે મુલાકાત બાદ તેઓ સોમવારે સાંજે જ પોતાના વતન રવાના થશે.
 
શેખ મોહમ્મદ બિન ઝાયેદ અલ નાહ્યાન સાથેનો ફોટો શેર કરતા પીએમ મોદીએ લખ્યું, "હું મારા ભાઈ, UAE ના રાષ્ટ્રપતિ, હિઝ હાઇનેસ શેખ મોહમ્મદ બિન ઝાયેદ અલ નાહયાનનું સ્વાગત કરવા એરપોર્ટ ગયો હતો. તેમની મુલાકાત ભારત-UAE ની મજબૂત મિત્રતાને તેઓ કેટલું મહત્વ આપે છે તે દર્શાવે છે. હું અમારી વાતચીતની રાહ જોઉં છું. પીએમ મોદીએ એરપોર્ટ પર UAE ના રાષ્ટ્રપતિનું સ્વાગત કર્યું. ત્યાર બાદ બંને નેતાઓ એક જ કારમાં આગળની મીટિંગ માટે રવાના થયા. પીએમ મોદીએ UAEના રાષ્ટ્રપતિ સાથેની તેમની મુલાકાત વિશે અરબીમાં પણ પોસ્ટ કરી.

મોહમ્મદ બિન ઝાયેદ અલ નાહ્યાનની ભારતની ત્રીજી મુલાકાત

રાષ્ટ્રપતિ બન્યા પછી મોહમ્મદ બિન ઝાયેદ અલ નાહયાનની આ ત્રીજી ભારત મુલાકાત છે. તેઓ પીએમ મોદીના ખાસ આમંત્રણ પર બે કલાકની મુલાકાતે છે. જોકે, તેમની મુલાકાત અત્યંત મહત્વપૂર્ણ માનવામાં આવે છે. બંને દેશો વચ્ચે પહેલાથી જ આશરે $100 બિલિયનનો વેપાર છે. UAE ભારતને ક્રૂડ ઓઇલ, LNG અને LPGનો મુખ્ય સપ્લાયર છે. આ જ કારણ છે કે બંને દેશોના ટોચના નેતાઓ વચ્ચેની બેઠકને મહત્વપૂર્ણ માનવામાં આવે છે. મધ્ય પૂર્વમાં અસ્થિરતા પણ બંને નેતાઓ વચ્ચેની બેઠકનું મહત્વ વધારે છે.