VIDEO: "સરકાર મોતોનો આંકડો છુપાવે છે, 7 નહીં 11 લાશો છે!" સત્ય નિકેતન દુર્ઘટના પર NSUI અધ્યક્ષના ખુલાસાથી દિલ્હીમાં ભારે હલચલ!
છેલ્લું અપડેટ : 07 Sept 2026
દિલ્હી યુનિવર્સિટીના સાઉથ કેમ્પસ નજીક આવેલા સત્ય નિકેતન વિસ્તારમાં પીજી (PG) ધરાશાયી થવાની ઘટનામાં મૃત્યુઆંકને લઈને મોટો વિવાદ સર્જાયો છે. નેશનલ સ્ટુડન્ટ્સ યુનિયન ઓફ ઈન્ડિયા (NSUI)ના રાષ્ટ્રીય અધ્યક્ષ વિનોદ જાખડે સરકાર અને વહીવટી તંત્ર પર મોતોનો સાચો આંકડો છુપાવવાનો ગંભીર આક્ષેપ કર્યો છે. તેમણે દાવો કર્યો છે કે હોસ્પિટલમાં 7 નહીં પરંતુ 11 મૃતદેહો મોજૂદ હતા.
"સરકાર સત્ય છુપાવી રહી છે, હોસ્પિટલમાં 11 ડેડબોડી હતી"
દિલ્હીમાં પત્રકારો સાથે વાત કરતા NSUI રાષ્ટ્રીય અધ્યક્ષ વિનોદ જાખડે સીધો પ્રહાર કરતા જણાવ્યું કે, “જ્યારે અમે યુનિવર્સિટી હોસ્પિટલની મુલાકાત લીધી, ત્યારે ત્યાં 11 મૃતદેહો રાખવામાં આવ્યા હતા. સરકાર કેવી રીતે દાવો કરી શકે કે માત્ર 7 લોકોના જ મોત થયા છે? આ સદંતર જૂઠ છે; સરકાર લોકો અને પરિવારો સામેથી સત્ય છુપાવવાનો પ્રયાસ કરી રહી છે. આ તમામ બાબતો પાછળ કોનો હાથ છે? જે પણ જવાબદાર છે તેમની સામે કડક પગલાં કેમ લેવાતા નથી?”
10 વર્ષમાં એક પણ હોસ્ટેલ કેમ ન બની?
દિલ્હી યુનિવર્સિટી (DU) અને કેન્દ્ર સરકાર સામે આકરા સવાલો ઉઠાવતા વિનોદ જાખડે કહ્યું કે, “છેલ્લા દસ વર્ષમાં દિલ્હી યુનિવર્સિટીએ વિદ્યાર્થીઓ માટે એક પણ નવી હોસ્ટેલ કેમ નથી બનાવી? આ ગેરકાયદે અને અસુરક્ષિત ખાનગી પીજી (PGs)ને કોણ પ્રોત્સાહન આપી રહ્યું છે? તેમને સુરક્ષા કવચ કોણ પૂરું પાડે છે? આમાં જવાબદારી નક્કી થવી જ જોઈએ.”
પીજીના મનસ્વી ભાડાં પર નિયંત્રણ અને કાયદાની માંગ
તેમણે વિદ્યાર્થીઓની સુરક્ષા અને શોષણ અટકાવવા માટે નક્કર કાયદો લાવવાની હિમાયત કરી હતી. જાખડે જણાવ્યું કે, પીજી સંચાલકો દ્વારા વસૂલવામાં આવતા મનસ્વી ભાડાં પર અંકુશ મૂકવા કડક નિયમનકારી કાયદો ઘડાવો જોઈએ. તમામ રહેણાંક ઇમારતોનું પ્રોપર મોનિટરિંગ અને સેફ્ટી ઓડિટિંગ થવું જોઈએ.
તેમણે સ્પષ્ટ ચેતવણી આપતા ઉમેર્યું કે, જ્યાં સુધી વિદ્યાર્થીઓના હિતમાં કડક કાયદો નહીં બને, દિલ્હી યુનિવર્સિટીમાં પર્યાપ્ત હોસ્ટેલોનું નિર્માણ નહીં થાય, પીડિત વિદ્યાર્થીઓને સંપૂર્ણ ન્યાય નહીં મળે અને આવી જર્જરિત ઇમારતોના સંચાલકો સામે દાખલારૂપ પગલાં નહીં લેવાય, ત્યાં સુધી NSUIનો સંઘર્ષ અને વિરોધ અવિરત ચાલુ રહેશે.