VIDEO : 'કાયદો ઘડવો એ સંસદનું કામ, કોર્ટનું નહીં'; હેટ સ્પીચ મુદ્દે સુપ્રીમ કોર્ટનો મોટો નિર્ણય

સુપ્રીમ કોર્ટે હેટ સ્પીચ સંબંધિત અરજીઓની સુનાવણી દરમિયાન એક અત્યંત મહત્વપૂર્ણ સ્પષ્ટતા કરતા જણાવ્યું કે, અદાલત સરકારને નવો કાયદો બનાવવા માટે મજબૂર કરી શકે નહીં. જસ્ટિસ વિક્રમ નાથ અને સંદીપ મહેતાની બેન્ચે આ મામલે કોઈ પણ નવી માર્ગદર્શિકા જાહેર કરવાનો ઇનકાર કરતા સ્પષ્ટ કર્યું કે કાયદો ઘડવો એ સંપૂર્ણપણે ધારાસભા અને સંસદના અધિકારક્ષેત્રમાં આવે છે. 

કોર્ટે વધુમાં ઉમેર્યું કે ન્યાયતંત્ર વધુમાં વધુ કોઈ ગંભીર ચિંતા તરફ સરકારનું ધ્યાન દોરી શકે અથવા સુધારા માટે ભલામણ કરી શકે, પરંતુ તે માટે નિર્દેશ આપી શકે નહીં. હેટ સ્પીચ સામેના હાલના કાયદાઓને વધુ અસરકારક બનાવવાની માંગ કરતી અરજીઓને ફગાવી દેતા પીઠે ભારપૂર્વક કહ્યું કે, કોર્ટની ભલામણો પર કઈ રીતે અને ક્યારે અમલ કરવો તે સરકારના વિવેકબુદ્ધિ પર નિર્ભર છે. આ ટિપ્પણી દ્વારા સુપ્રીમ કોર્ટે લોકશાહીમાં ન્યાયતંત્ર અને ધારાસભા વચ્ચેની મર્યાદાઓને ફરી એકવાર સ્પષ્ટ કરી છે.