Video: "ચૂંટણીમાં ગેરરીતિ કરીને આખી સરકાર ચોરી લીધી": 1 નવેમ્બરની રેલી પૂર્વે કોંગ્રેસ નેતા દીપેન્દ્ર સિંહ હુડ્ડાનો ભાજપ પર મોટો પ્રહાર
હરિયાણા કોંગ્રેસના અગ્રણી નેતાઓ અને ઓલ ઇન્ડિયા કોંગ્રેસ કમિટી (AICC)ના સંગઠન મહાસચિવ કે. સી. વેણુગોપાલ વચ્ચે નવી દિલ્હી ખાતે યોજાયેલી મહત્વપૂર્ણ બેઠક બાદ કોંગ્રેસ સાંસદ દીપેન્દ્ર સિંહ હુડ્ડાએ ભાજપ પર ગંભીર આક્ષેપો કર્યા છે. તેમણે દાવો કર્યો કે આગામી ૧ નવેમ્બરના રોજ યોજાનારી રેલી ઐતિહાસિક સાબિત થશે અને તેમાં હરિયાણાની જનતાનો ભારે આક્રોશ જોવા મળશે.
બેઠક બાદ મીડિયા સમક્ષ વાત કરતા દીપેન્દ્ર સિંહ હુડ્ડાએ મુખ્ય મુદ્દાઓ રજૂ કર્યા હતા. હુડ્ડાએ જણાવ્યું કે આજની બેઠક મુખ્યત્વે 1 નવેમ્બરની રેલીના આયોજન અને પૂર્વતૈયારીઓ પર કેન્દ્રિત હતી. હરિયાણા પ્રદેશ કોંગ્રેસ અને રાજ્યભરમાંથી લાખો લોકો આ રેલીમાં ઉત્સાહભેર ભાગ લેશે અને આ રેલી ઐતિહાસિક બની રહેશે.
"ચૂંટણીમાં ગોટાળો કરીને સરકાર ચોરાઈ"
ભાજપ પર સીધો પ્રહાર કરતા તેમણે કહ્યું કે, "હરિયાણા એવું રાજ્ય છે જ્યાં ચૂંટણીમાં ખુલ્લેઆમ ગેરરીતિ અને હેરાફેરી કરીને માત્ર એક-બે સીટો નહીં, પરંતુ સમગ્ર સરકાર જ ચોરી લેવામાં આવી છે."
જનતામાં ભારોભાર આક્રોશ
તેમણે આગળ ઉમેર્યું કે હરિયાણાના લોકો આ સમગ્ર ઘટનાક્રમથી નારાજ છે અને પોતાના આક્રોશની અભિવ્યક્તિ કરવા માટે આગામી 1 નવેમ્બરની રેલીમાં રેકોર્ડબ્રેક સંખ્યામાં ઉમટી પડશે.
