PMએ CJIને CEC નિમણૂક પ્રક્રિયામાંથી દૂર કેમ કર્યા, રાહુલ ગાંધીના મોદી સરકારને તીખા ત્રણ સવાલ

આજે સંસદના ચાલી રહેલા શિયાળુ સત્રના સાતમા દિવસે લોકસભામાં ચૂંટણી સુધારાઓ પર ચર્ચા ચાલી રહી છે. સંસદના નીચલા ગૃહમાં આ મુખ્ય ચર્ચા મતદાર યાદી સુધારણાથી લઈને ઇલેક્ટ્રોનિક મતદાન મશીનો (EVM) ની વિશ્વસનીયતા અને રાજકીય પક્ષોને અનામી દાનો સુધીના દરેક પાસાને આવરી લેશે. આ મુદ્દે લોકસભામાં બોલતા રાહુલ ગાંધીએ કહ્યું કે, ચૂંટણી સુધારા જરૂરી છે. ચૂંટણીના એક મહિના પહેલા તમામ રાજકીય પક્ષોને મશીન-રીડેબલ મતદાર યાદીઓ આપવી જોઈએ. સીસીટીવી ફૂટેજનો નાશ કરવા સામેના કાયદામાં પણ ફેરફાર થવો જોઈએ. EVM જોવાની મંજૂરી આપવી જોઈએ. મત ચોરી રાષ્ટ્ર વિરોધી છે. આપણે એક મહાન લોકશાહી છીએ. સરકાર ચૂંટણી સુધારા ઇચ્છતી નથી.

દેશના બધા જ મુદ્દા સમાન છે - રાહુલ ગાંધી

લોકસભામાં વિરોધ પક્ષના નેતા રાહુલ ગાંધી ચૂંટણી સુધારાઓ પર ચર્ચા દરમિયાન બોલી રહ્યા છે. તેમણે કહ્યું કે ખાદી માત્ર એક કાપડ નથી, પરંતુ ભારતનો આત્મા છે. દરેક પ્રદેશની ઓળખ અલગ અલગ કપડાંઓથી છે. રાહુલ ગાંધીએ આસામના ગમછા (સ્કાર્ફ) થી લઈને કાંચીપુરમ સાડી સુધીની ચર્ચા કરતા કહ્યું કે આપણો દેશ એક કાપડ જેવો છે. દેશનું પ્રતિબિંબ તેના કપડાં છે. દેશના બધા જ મુદ્દા સમાન છે. આપણો દેશ 1.5 અબજ લોકોથી બનેલો છે. દેશના બધા જ મુદ્દા સમાન છે. રાહુલ ગાંધીએ કહ્યું કે RSS બધી સંસ્થાઓ પર કબજો કરવા માંગે છે. નથુરામ ગોડસેએ ગાંધીની હત્યા કરી એ એક અસ્વસ્થતાભર્યું સત્ય છે.

ચૂંટણી પંચની સત્તા સાથે સાંઠગાંઠ: રાહુલ ગાંધી

શાસક પક્ષના હોબાળાનો જવાબ આપતા રાહુલ ગાંધીએ કહ્યું, "મેં કંઈ ખોટું કહ્યું નથી. શૈક્ષણિક સંસ્થાઓ પર કબજો જમાવી દેવામાં આવ્યો છે. કુલપતિઓની નિમણૂક યોગ્યતાના આધારે નહીં, પરંતુ એક સંસ્થા સાથેના તેમના જોડાણ પર આધારિત છે. CBI અને ED પણ એક જ સંસ્થા સાથે જોડાયેલા વ્યક્તિઓ દ્વારા કબજે કરવામાં આવી છે. દેશમાં ચૂંટણીઓનું નિયંત્રણ કરતી ત્રીજી સંસ્થા ચૂંટણી પંચ પણ એક સંસ્થા દ્વારા કબજે કરવામાં આવી છે. મારી પાસે આના પુરાવા છે.

ભાજપ લોકશાહીને નુકસાન પહોંચાડવા માટે ચૂંટણી પંચનો ઉપયોગ કરી રહી છે. CJI ને CEC નિમણૂક પ્રક્રિયામાંથી દૂર કરવામાં આવ્યા હતા. હું ત્યાં બેઠો હતો, એક તરફ PM મોદી અને અમિત શાહ હતા અને બીજી તરફ હું. કોઈ પણ વડા પ્રધાને આવું કર્યું નથી. ડિસેમ્બર 2023માં નિયમોમાં ફેરફાર કરવામાં આવ્યા હતા જેથી કોઈ પણ ચૂંટણી કમિશનરને સજા ન થઈ શકે. આ 2024 ની લોકસભા ચૂંટણી પહેલા કરવામાં આવ્યું હતું. CCTV અને ડેટા સંબંધિત નિયમોમાં ફેરફાર કરવામાં આવ્યા હતા. ચૂંટણી પંચ સત્તા સાથે સાંઠગાંઠમાં છે. આ ડેટાનો પ્રશ્ન નથી, પરંતુ ચૂંટણીનો છે.

રાહુલ ગાંધીએ RSSનો ઉલ્લેખ કરતા લોકસભામાં હોબાળો મચ્યો

રાહુલ ગાંધીએ કહ્યું કે દેશની બધી યુનિવર્સિટીઓના કુલપતિઓ RSSના છે. આનાથી શાસક પક્ષના સભ્યોએ હોબાળો મચાવ્યો. સ્પીકર ઓમ બિરલાએ રાહુલ ગાંધીને ફક્ત ચૂંટણી સુધારા પર જ બોલવા કહ્યું અને કોઈ પણ સંગઠનનો ઉલ્લેખ ન કરવા કહ્યું. સંસદીય બાબતોના મંત્રી કિરેન રિજિજુએ કહ્યું, "આપણે બધા અહીં વિપક્ષના નેતાને સાંભળવા માટે છીએ. જો તેઓ આ વિષય પર બોલવા માંગતા ન હોય તો તેઓ બધાનો સમય કેમ બગાડી રહ્યા છે?

હરિયાણા અને મહારાષ્ટ્રમાં ગેરરીતિઓ સાબિત કરી બતાવી

રાહુલ ગાંધીએ કહ્યું કે હરિયાણામાં મતદાર યાદીમાં બ્રાઝિલની એક મહિલાનો ફોટો 22 વખત છપાયો. સ્પીકર ઓમ બિરલાએ તેમને અટકાવતા કહ્યું, "તમે વિપક્ષના નેતા છો, જો તમે ગરીમા જાળવીને બોલશો તો ઠીક છે. નહિંતર, ગૃહ આ રીતે કામ કરશે નહીં. તમારે તમારા સભ્યોને સદનની ગરમીમા સમજાવો. વિરોધ કરવાની પ રીત હોય છે. પરંતુ શું આ પદ્ધતિ યોગ્ય છે?" રાહુલ ગાંધીએ પૂછ્યું, "CEC ને નિયંત્રિત કરવાનો શું અર્થ છે? આ ફોટા અહીં બતાવવા ઈચ્છતા નથી. પરંતુ આ ચૂંટણી ચોરીનો સવાલ છે. તેમણે ચૂંટણી પંચ ઉપર પ્રૂફ સાથે કરેલા સીધા સવાલના જવાબ ન આપવા બદલ પંચની ટીકા કરી હતી. SIR પછી બિહારમાં મતદાર યાદીમાં 1,22,000 ડુપ્લિકેટ ફોટા છપાયા છે. આ કેવી રીતે રહી ગયા. અમે હરિયાણા અને મહારાષ્ટ્રમાં મત ચોરી સાબિત કરી બતાવી છે.