લેબનોનમાં પેજર બ્લાસ્ટ મામલે કેરળના વ્યક્તિનું નામ સામે આવ્યું, પિતા વાયનાડમાં કરે છે દરજીકામ

લેબનોનમાં પેજર બ્લાસ્ટ બાદ આખી દુનિયા ચોંકી ગઈ છે. હિઝબુલ્લાએ આ વિસ્ફોટો માટે ઈઝરાયેલને જવાબદાર ઠેરવ્યું છે. તે જ સમયે, અમેરિકન એજન્સીઓનું પણ કહેવું છે કે આ પેજર્સ ઇઝરાયેલ દ્વારા બનાવવામાં આવ્યા હતા અને આ હુમલાનું ષડયંત્ર છેલ્લા 15 વર્ષથી ચાલી રહ્યું હતું. હુમલાની યોજનામાં શેલ કંપનીઓ સામેલ હતી. ગુપ્તચર અધિકારીઓએ જ કંપનીઓની રચના કરી હતી. આ પેજર વિસ્ફોટોમાં ઓછામાં ઓછા 20 હિઝબુલ્લાના સભ્યો માર્યા ગયા અને હજારો ઘાયલ થયા.

પેજર બ્લાસ્ટ મામલે કેરળમાં જન્મેલા નોર્વેના નાગરિકનું નામ પણ સામે આવ્યું છે. હંગેરિયન મીડિયા અનુસાર, નોર્ટા ગ્લોબલ લિમિટેડ નામની બલ્ગેરિયન કંપની પેજર ડીલમાં સામેલ હતી. આ કંપનીના સ્થાપક રિન્સન જોસ છે જે નોર્વેના નાગરિક છે. કેરળના સ્થાનિક મીડિયા અહેવાલમાં જણાવવામાં આવ્યું છે કે રિન્સન જોસનો જન્મ વાયનાડમાં થયો હતો અને તે એમબીએ પૂર્ણ કર્યા પછી નોર્વે ગયો હતો. કેટલીક ટીવી ચેનલોએ તેના સંબંધીઓ સાથે પણ વાત કરી હતી.

પિતા દુકાનમાં દરજી તરીકે કામ કરે છે

રિન્સનના પિતા જોસ મૂતીડેમ એક દુકાનમાં દરજી તરીકે કામ કરે છે. આસપાસના લોકો તેને ટેલર જોસ તરીકે ઓળખે છે. બલ્ગેરિયન સુરક્ષા એજન્સી SANS એ તપાસ બાદ કહ્યું છે કે તેમના દેશમાંથી આવો કોઈ સામાન સપ્લાય કરવામાં આવ્યો નથી. આવી સ્થિતિમાં રિન્સન જોસને પણ ક્લીનચીટ આપવામાં આવી છે. બ્લાસ્ટ થયેલા પેજર્સ પર તાઈવાનની કંપની ગોલ્ડ અપોલોનું નામ લખેલું હતું. જોકે, ગોલ્ડ એપોલોના સીઈઓ ચિંગ કુઆંગે કહ્યું છે કે આ તેમની પ્રોડક્ટ્સ નથી. માત્ર તેમની બ્રાન્ડનો ઉપયોગ કરવામાં આવ્યો છે.

ઘણા દેશોમાંથી જાળ બિછાવી હતી

એવો દાવો કરવામાં આવે છે કે ઇઝરાયેલે હિઝબુલ્લાહને નિશાન બનાવવા માટે ઘણા દેશોમાં જાળ બિછાવી હતી. ગોલ્ડ એપોલોના સીઈઓએ પેજર બ્લાસ્ટ માટે હંગેરિયન કંપની એએસી કન્સલ્ટિંગનું નામ આપ્યું છે. તેમનું કહેવું છે કે બુડાપેસ્ટની એક કંપની આ પેજર બનાવતી હતી. તેમની કંપની સાથે ત્રણ વર્ષનો કરાર હતો. જ્યારે હંગેરીના મીંડિયાનું કહેવું છે કે બીએસી કન્સલ્ટિંગે વ્યવહારમાં મધ્યસ્થી તરીકે કામ કર્યું હતું. આ કંપનીની કોઈ ઓફિસ પણ નથી. જ્યારે બલ્ગેરિયાના નોર્ટા ગ્લોબલની સ્થાપના કેરળમાં જન્મેલા રિન્સન જોસે કરી હતી.