VIDEO: નવી મુંબઈના રેસ્ટોરન્ટમાં જોરદાર વિસ્ફોટ, બે લોકો ગંભીર રીતે ઘાયલ; અનેક દુકાનોના શટર અને બારીઓ તૂટી

મહારાષ્ટ્રના નવી  મુંબઈના સાનપાડા સેક્ટર-1 વિસ્તારમાં મંગળવારે એક રેસ્ટોરન્ટમાં જોરદાર વિસ્ફોટ (Explosion) થતાં અફરાતફરી મચી ગઈ હતી. વિસ્ફોટ એટલો શક્તિશાળી હતો કે આસપાસની અનેક દુકાનોના શટર ઉખડી ગયા હતા અને નજીકના મકાનો તથા હોસ્પિટલની કાચની બારીઓને પણ નુકસાન થયું હતું. ઘટનામાં બે લોકો ઘાયલ થયા છે, જેમને સારવાર માટે હોસ્પિટલમાં દાખલ કરવામાં આવ્યા છે.

સિલિન્ડર બ્લાસ્ટની આશંકા

પ્રાથમિક માહિતી મુજબ, સાનપાડા સેક્ટર-1ની પ્રતીક્ષા બિલ્ડિંગમાં આવેલા સગર ફેમિલી રેસ્ટોરન્ટમાં વિસ્ફોટ થયો હતો. શરૂઆતમાં આ વિસ્ફોટ ગેસ સિલિન્ડર (Gas Cylinder)માં ખામીના કારણે થયો હોવાની આશંકા વ્યક્ત કરવામાં આવી રહી છે. જોકે, વિસ્ફોટનું ચોક્કસ કારણ હજુ સુધી સામે આવ્યું નથી અને સમગ્ર મામલે તપાસ ચાલી રહી છે.

વિસ્ફોટના કારણે રેસ્ટોરન્ટની આસપાસ આવેલી લગભગ પાંચથી છ દુકાનોના શટર તૂટી ગયા હતા. રેસ્ટોરન્ટની સામેના સર્વિસ રોડ અને ફ્લાયઓવર બાદ આવેલા હોસ્પિટલ વિસ્તારમાં પણ તેની અસર જોવા મળી હતી. લગભગ 100 મીટર દૂર આવેલા સૂરજ હોસ્પિટલની દિવાલ અને કાચની બારીઓને નુકસાન પહોંચ્યું હતું.

બે લોકોની હાલત ગંભીર

આ ઘટનામાં રેસ્ટોરન્ટમાં રહેતા બે લોકો ઘાયલ થયા હોવાનું સામે આવ્યું છે. બંનેને વાશીની મહાનગરપાલિકા હોસ્પિટલમાં (Municipal Hospital) સારવાર માટે ખસેડવામાં આવ્યા છે. અહેવાલ મુજબ બંનેની હાલત ગંભીર હોવાનું જણાવવામાં આવી રહ્યું છે.

વિસ્ફોટ બાદ સ્થાનિક લોકોમાં ગભરાટ ફેલાયો હતો. ઘટનાસ્થળ નજીક મોર્નિંગ વોક કરી રહેલા લોકોએ બંને ઘાયલોને બહાર આવતા જોયા હતા. ત્યારબાદ પોલીસ અને ફાયર બ્રિગેડને જાણ કરવામાં આવી હતી.

ફોરેન્સિક ટીમે પુરાવા એકત્ર કર્યા

માહિતી મળતાં જ પોલીસ અને ફાયર બ્રિગેડની ટીમો ઘટનાસ્થળે પહોંચી હતી. જોકે, વિસ્ફોટ બાદ આગ લાગી ન હોવાથી ફાયર બ્રિગેડને આગ બુઝાવવાની જરૂર પડી નહોતી. બીજી તરફ, ફોરેન્સિક ટીમ (Forensic Team)એ સ્થળ પર પહોંચીને પુરાવા એકત્ર કર્યા છે.

સ્થાનિકોના જણાવ્યા મુજબ, વિસ્ફોટનો અવાજ લગભગ એક કિલોમીટર દૂર સુધી સંભળાયો હતો. ઘટનાના CCTV (CCTV Footage) ફૂટેજ પણ સામે આવ્યા છે. અધિકારીઓ દ્વારા વિસ્ફોટના ચોક્કસ કારણની તપાસ કરવામાં આવી રહી છે.