VIDEO: JPSC 14મી સિવિલ સેવા પરીક્ષા રદ થશે? JPSC ભરતી કૌભાંડ મામલે સુપ્રીમ કોર્ટ લેશે મોટો નિર્ણય
છેલ્લું અપડેટ : 08 Aug 2026
ઝારખંડ લોક સેવા આયોગ (JPSC)ની 14મી સંયુક્ત સિવિલ સેવા પ્રારંભિક પરીક્ષા-2025 માં કથિત અનિયમિતતાનો મામલો હવે સુપ્રીમ કોર્ટ પહોંચ્યો છે. સામાજિક કાર્યકર અને રાજકીય નેતા હરિશરણ દેવગન દ્વારા આ મામલે સુપ્રીમ કોર્ટમાં જનહિત અરજી (PIL) દાખલ કરવામાં આવી છે. આ મામલો એવા સમયે સુપ્રીમ કોર્ટ પહોંચ્યો છે, જ્યારે ઝારખંડમાં JPSC અને JSSCની ભરતી પરીક્ષાઓમાં કથિત ગડબડીઓને લઈને વિદ્યાર્થીઓનું આંદોલન સતત ચાલુ છે.
સુપ્રીમ કોર્ટમાં કરાઈ PIL
સુપ્રીમ કોર્ટ રજિસ્ટ્રીમાં આ અરજી ડાયરી નંબર 47998/2026 હેઠળ નોંધાયેલી છે. જેમાં 19 એપ્રિલ 2026ના રોજ લેવાયેલી પ્રારંભિક પરીક્ષાની સમગ્ર પ્રક્રિયાની સ્વતંત્ર, નિષ્પક્ષ અને સમયબદ્ધ તપાસની માંગ કરવામાં આવી છે. અરજીમાં પ્રશ્નપત્રોની સુરક્ષા, OMR શીટની કસ્ટડી અને મૂલ્યાંકન પ્રક્રિયામાં ગડબડીની તપાસની માંગ કરાઈ છે. અરજદારે આ તપાસ CBIને સોંપવા અથવા નિવૃત્ત ન્યાયાધીશની અધ્યક્ષતામાં સ્વતંત્ર સમિતિ રચવા માંગ કરી છે.
OMR વાયરલ થયા બાદ વધ્યો વિવાદ
અરજી અનુસાર, 2 જુલાઈ 2026ના રોજ JPSC પ્રારંભિક પરીક્ષાનું પરિણામ જાહેર થયા બાદ વિવાદ વધ્યો હતો. એક સફળ ઉમેદવારની OMR ઉત્તરવહીની કાર્બન કોપી વાઈરલ થઈ હતી, જેમાં આરોપ હતો કે, ઉમેદવારે પ્રથમ પેપરમાં 100 માંથી માત્ર 48 પ્રશ્નોના જ જવાબ આપ્યા હતા, છતાં તેને સફળ જાહેર કરાયો હતો.
પરીક્ષા રદ કરી નવેસરથી યોજવાની માંગ
અરજીમાં 19 એપ્રિલ 2026ની JPSC પ્રારંભિક પરીક્ષા રદ કરીને અદાલતની દેખરેખ હેઠળ નવી પરીક્ષા યોજવાની માંગ કરવામાં આવી છે. આ ઉપરાંત OMR સ્કેનિંગ, મૂલ્યાંકન અને પરિણામ તૈયાર કરવાની પ્રક્રિયાનું સ્વતંત્ર ઓડિટ કરાવવા તથા પરીક્ષાથી જોડાયેલા તમામ ભૌતિક અને ઈલેક્ટ્રોનિક રેકોર્ડ્સ (CCTV, OMR શીટ, બાયોમેટ્રિક) સુરક્ષિત રાખવાના નિર્દેશ આપવા વિનંતી કરવામાં આવી છે.
સુપ્રીમ કોર્ટમાં અરજદાર તરફથી સિનિયર એડવોકેટ સોનિયા માથુર સાથે એડવોકેટ સત્યમ સિંહ રાજપૂત, આદર્શ સિંહ અને મુસ્કાન સિંહ લડત આપી રહ્યા છે.